आचारसंहिता पालना गर्न आग्रह

आचारसंहिता पालना गर्न आग्रह
सर्लाही समाचारदाता
मलंगवा, कात्तिक १२ । जिल्ला न्यायाधिश एवं मुख्य निर्वाचन अधिकृत कृष्णकमल अधिकारीले निर्वाचनमा भाग लिएका राजनैतिक दल एवं उम्मेद्वारहरुलाई निर्वाचन आचारसंहिताको ख्याल गर्न आग्रह गरेका छन् ।
राजनैतिक दलहरु एवं उम्मेद्वारलाई निर्वाचन आचारसंहिताको ख्याल गरेर चुनाव प्रचारप्रसार गर्न आग्रह गर्दै पटक–पटक लिखित र मौखिक रुपमा सचेत गराईएको मुख्य निर्वाचन अधिकृत अधिकारीले बताए । ‘‘आज विहान ‘मर्नीङ वाक’ जाने क्रममा एकजना उम्मेद्वारको पोष्टर जिल्ला अदालत भवनको कम्पाउण्ड वालमा टाँस्न भ्याईहालेछन् ।’’ जिल्ला न्यायाधिस समेत रहेका अधिकारीले भने–‘‘मैले तत्काल निर्वाचन अनुगमन अधिकृतलाई भनेर हटाउन लगाएँ ।’’
आचारसंहिता उल्लंघनका ठूला खाले घटनाहरु भएको जानकारीमा नआएको उल्लेख गर्दै मुख्य निर्वाचन अधिकृत अधिकारीले भएको थाहा पाईए र उजुरी परेमा कानून बमोजिम कार्वाही गरिने बताए । निर्वाचन आचारसंहिता पालनाबारे अनुगमन कार्य पनि जारी रहेको मुख्य निर्वाचन अधिकृत अधिकारीको भनाई थियो । राजनैतिक दल र उम्मेद्वारहरुबाट निर्वाचन प्रचारप्रसारमा प्रयोग हुने सवारी साधनको पास लिने क्रम पनि पहिलाको तुलनामा बढिरहेको अधिकारीले जानकारी दिए ।