सर्लाहीका म्यादी रौतहट पठाईयो

सर्लाहीका म्यादी रौतहट पठाईयो
सर्लाही समाचारदाता
मलंगवा, कात्तिक १३ । भागेका कारण अपुग भएपछि बुधबार सर्लाहीबाट ६० जना म्यादी प्रहरी रौतहट जिल्ला प्रहरी कार्यालयमा पठाईएको छ ।
जिल्ला प्रहरी कार्यालयका प्रवक्ता पृथ्वीनारायण ओलीका अनुसार वैकल्पिकमा नाम प्रकाशित भएका ६० जना म्यादी प्रहरीलाई नियुक्ति दिएर जिल्ला प्रहरी कार्यालय रौतहट पठाइएको हो । ‘‘तालिममा सहभागि म्यादीहरु भागेपछि अपुग भएका कारण माग भएअनुसार ६० जना आज पठायौं ।’’ प्रवक्ता ओलीले बुधबार सर्लाही दैनिकसँग भने–‘‘पहिला पनि ४१ जना वैकल्पिक म्यादीलाई नियुक्ति दिएर धनुषा र महोतरी पठाईसकेका थियौं ।’’  धनुषा र महोत्तरीबाट सर्लाही आएका एकहजार चारसय ६५ म्यादी प्रहरी मध्ये एकसय दुईजना भागेका छन् । अपुग भएपछि ८७ जना वैकल्पिक म्यादी मगाईपनि पूनः भागेका कारण हाल जिल्लामा एकहजार चारसय ५० जनामात्र म्यादी प्रहरीहरु रहेको प्रवक्ता ओलीले बताए ।
आवेदन लिने बेलामा भनिएको भन्दा कम सुविधा दिन लागिएको भन्दै म्यादी प्रहरीमा नियुक्ति लिएर तालिममा बसेकाहरु पनि भाग्ने क्रम जारी छ । पहिला नेपाल प्रहरीको जवानको दुईमहिना बराबरको संपूर्ण सेवा सुविधा दिने भनिएपनि हाल डेढ महिनाको मात्र दिने भनिएको र काम समेत अन्यत्रै जिल्लामा गर्नु परेको भन्दै म्यादी प्रहरी छाड्नेहरुको संख्या दिनप्रतिदिन बढ्दै गएको हो । एकहजार चार सय ६५ जनाको लागि भर्ना खुलेको भएपनि सर्लाहीमा ५ हजार भन्दा बढीले आवेदन भरेका थिए ।