शान्ति समिति संयोजकमा दिनेश

सर्लाही समाचारदाता
मलंगवा, वैशाख २२ । स्थानीय शान्ति समिति सर्लाहीको संयोजकमा दिनेश राय चयन भएका छन् ।
शरद् सिंह भण्डारी नेतृत्वको राष्ट्रिय मधेश समाजवादी पार्टीका नेता रायलाई मंगलबार बसेको समितिको बैठकले संयोजकमा चयन गरेको हो । स्रोतका अनुसार तीन महिना अघि नै नयाँ संयोजक चयन गर्नुपर्ने भएपनि एमाओवादीकी विनिता दाहाल, लालबाबु राय, दिनेश राय लगायत नेताहरुबीच हानाथापका कारण तीन महिनादेखि रोकिँदै आएको थियो ।  मंगलबार निवर्तमान संयोजक प्रमोद साहको अध्यक्षतामा बसेको समितिको बैठकले दिनेश रायलाई ६ महिनाका लागि संयोजकमा चयन गरेको हो । हरेक ६–६ महिनामा २३ सदस्यीय समितिको पालैपालौ संयोजक हुने व्यवस्था रहेको छ । १० वर्षे माओवादी द्वन्द्वका क्रममा मृत्यु, अपांग, वेपत्ता, घाईते, विस्थापित सहित क्षतिग्रस्त संरचनाहरुको बारेमा अध्ययन गर्ने एवं उचित क्षतिपूर्ति उपलब्ध गराउने लगायत शान्ति प्रकृयाका लागि समितिको महत्वपूर्ण भूमिका हुने गर्दछ ।