‘हामी जस्ता गरिबका लागि खै प्रहरी ?’
सर्लाही समाचारदाता
बबरगंज, फागुन १४ । ‘‘गाउँमा सामान्य झै–झगडा हुँदा पनि घटनामा संलग्नहरुलाई प्रहरीले तुरुन्त नियन्त्रणमा लिएर आवश्यक कार्वाही अगाडी बढाउँछ, तर हाम्रो दाईको हत्या भएको महिना दिनभन्दा बढी भईसके पनि कुनै वास्ता गरिएको छैन ।’’ यो भनाई हो गत माघ १ गते अपहरणमा परेर १२ दिनपछि खाडलमा गाडिएको अवस्थामा शव फेला परेका बबरगंज गाविसका जगन्नाथ महतोका भाई विश्वनाथ महतोको । ‘‘खै के भनुँ के भनुँ मेरो त गला नै आउँदैन ।’’ सर्लाही दैनिकसँग कुरा गर्दै विश्वनाथले गुनासो गरे–‘‘ठुलाबडाको भए अहिलेसम्म के–के भइसक्थ्यो, हामी गरिब परिवारका मान्छे भएर होला केही हुन नसकेको ।’’ प्रहरीले घटनाको दोषिलाई पक्राउ गर्न नसक्दा हाल आफ्नो परिवारलाई गाउँमा थप धम्कीहरु आउन थालेको समेत महतोले दुःखेसो व्यक्त गरे ।
बबरगंज गाविस–८ निवासी करिब ४२ वर्षिय जगन्नाथ महतोको शव गाउँ नजिकै खेतमा गाडिएको अवस्थामा गत माघ १२ गते साँझ फेला परेको थियो । मृतक महतो माघ १ गते बुधबार राती साँढे ८ बजेबाट परिवारसँग सम्पर्क विहिन भएका थिए । माघ १ गते अपहरणमा परेका जगन्नाथको हत्या पश्चात शव गाडिएको कुरामा जिल्ला स्थित प्रहरी नेतृत्वले समेत स्वीकार गरिसकेको छ ।
घटना भएको झण्डै डेढमहिना वितिसक्दा समेत हत्यामा संलग्नहरु नियन्त्रणमा र कार्वाहीको दायरामा नआउनु दुःखद भएको पीडिति परिवारले बताएका छन् । गत माघ १२ गते गाउँ नजिकै अपहरण पश्चात हत्या गरिएका बबरगंज गाविसका जगन्नाथ महतोका परिवारले घटनाका दोषि एकमहिना वितिसक्दा समेत पक्राउ पर्न नसकेकामा दुःखेसो व्यक्त गरेका छन् ।
मृतकका आफन्त एवं जिल्ला अस्पतालका पूर्व कर्मचारी मेनीचन्द्र महतोले घटनाबारे प्रहरीले कुनै वास्ता नगरेको आरोप लगाए । ‘‘खै कति भन्दा पनि कुनै वास्ता हुँदैन ।’’उनले भने–‘‘अपहरणमा परेको केही दिनपछि नै घटनाबारे जानकारी गरायौं, न्याय पाउँछौं भनेको त, हामीले आÇनो मान्छेको लाश पो फेला पा¥यौं ।’’
मृतक जगन्नाथका भाई विश्वनाथले प्रहरीले कहिले यता त कहिले उता भनेर झुलाउन खोजेको समेत आरोप लगाए । ‘‘जिल्ला प्रहरी कार्यालय गयो, इलाका प्रहरी कार्यालय इश्वरपुर जा भन्छ, त्यहाँ गयो अनुसन्धान भईराको छ भन्छ ।’’ उनले भने–‘‘के गर्ने के नगर्ने अलमल्ल परेर बसेका छौं ।’’
गाउँका बालबालिका खेल्दै जाने क्रममा खाल्डो खनेर गाडिएको स्थानमा हात मात्र बाहिर निस्केको देखेपछि खनेर हेर्दा महतोको शव फेला परेको हो । खाल्डो खनेर माटोले पुरेको शवलाई स्यालले खनेपछि एउटा हात बाहिर निस्केको र बालबालिकाले देखेको बताईएको छ ।
मृतकका आफन्त मेनीचन्द्र महतोका अनुसार गाउँकै रामविर साह तेलीले फोन गरेर बोलाएपछि माघ १ गते बुधबार राती ८ बजेतिर जगन्नाथ घरबाट बाहिरिएको र त्यसपश्चात परिवारसँग सम्पर्क विहिन भएका थिए । ‘‘राती घरबाट बाहिरिएपछि लगातार उनको मोबाईलमा फोन ग¥यौं, कहिले घण्टी जाने र नउठ्ने त कहिले उठाएर केही पनि नबोल्ने हुन्थ्यो ।’’ मेनीचन्द्रले सर्लाही दैनिकसँग भने–‘‘फोन गरेर बोलाउने रामविर र मृतक जगन्नाथ दुवैजना एकसाथ गाउँबाट वेपत्ता भएका थिए ।’’ मृतकका भाई विश्वनाथका अनुसार पहिला आफन्त लगायत सम्भावित स्थानहरुमा खोजवीन गर्दापनि फेला नपरेपछि अपहरण भएको हुन सक्ने आशंकाका साथ घटनाबारे प्रहरीलाई खबर गरिएको थियो ।
जगन्नाथको शव फेला परेको भोलिपल्ट माघ १३ गते मृतकका भाई विश्वनाथले गाउँकै रामविर साह तेली विरुद्ध हत्यामा संलग्न भएको किटानी जाहेरी दिएका थिए । घटनाबारे सुक्ष्म ढंगले अनुन्धान भईरहेको र हत्यामा संलग्नहरुको खोजीकार्य व्यापक रुपमा भईरहेको जिल्ला प्रहरी कार्यालयले जनाएको छ ।
‘‘अपहरण एवं हत्यामा संलग्नहरुको पहिचान भईसकेको छ ।’’ जिल्ला प्रहरी कार्यालयका प्रवक्ता प्रहरी निरीक्षक पृथ्वीनारायाण ओलीले भने–‘‘सन्धिग्द अभियुक्तहरु लुकेको स्थानमा पटक–पटक छापा समेत मारिसकेका छौं, उनीहरु भागेर हिडिरहेका छन्, चाँडै नै हाम्रो नियन्त्रणमा आउने निश्चित छ ।’’ घटनामा किटानी जाहेरी परेका रामविरसँगै गाउँकै अर्का एकजना पनि फरार रहेको प्रहरीले जनाएको छ ।
प्रहरी नायव उपरीक्षक सन्तोष भट्टराईले घटनामा संलग्न अभियुक्त पक्राउ गर्नका लागि जिल्ला प्रहरी कार्यालय र घटना स्थल पर्ने इलाका प्रहरी कार्यालय इश्वरपुको टोली निरन्तर खटिएको बताए । ‘‘घटनामा संलग्न लुकेको हुन सक्ने सम्भावित काठमाडौं र भारतका विभिन्न स्थानहरुमा सादा पोशाकका प्रहरीले पटक–पटक छापा मारिसकेका छन् ।’’ प्रनाउ भट्टराइले भने–‘‘चाँडै नै उनीहरु हाम्रो नियन्त्रणमा आउनेछन् ।’’
एक श्रीमति सहित दुई छोराका पिता जगन्नाथ गाउँमा ट्रेक्टर व्यवसाय गर्थे भने केही वर्षअघिसम्म उनको गाउँमा धान कुट्ने सेलर मिल समेत रहेको थियो । उनका दुवै छोरा वैदेशिक रोजगारीमा छन्
परिवारजनका अनुसार रामवीरसँग जगन्नाथको जग्गा सम्बन्धी किचलो रहेको थियो । मेनीचन्द्रका अनुसार रामवीरले ऋण लिएबापत भारतका एक व्यापारीलाई पास गरिदिएको जग्गा जगन्नाथले किन्ने प्रकृया अगाडी बढाएपछि रामविर जगन्नाथसँग रिसाएका थिए । जगन्नाथ वेपत्ता हुनु १० दिनअघिदेखि रामविरले उनीसँग गहिरो हिमचिम बढाएको र सोही विश्वासमा राती फोनमा बोलाउने वितिकै उनी गएको परिवारजनले बताएका छन् ।
