सुरक्षाकर्मीहरुको काज फिर्ता

सुरक्षाकर्मीहरुको काज फिर्ता
सर्लाही समाचारदाता
मलंगवा, कात्तिक १० । जिल्लामा कार्यरत नेपाल प्रहरीका विभिन्न ईकाईबाट आइतबार तीन दर्जन भन्दा बढी सुरक्षाकर्मीहरुलाई दरबन्दी भएकै स्थानमा रवाना दिईएको छ ।
‘‘आइतबारमात्र जिल्लाका विभिन्न स्थानबाट ३५ जना हाराहारीमा रवाना दिईएको छ ।’’ जिल्ला प्रहरी कार्यालयका प्रवक्ता एवं प्रहरी निरीक्षक पृथ्वीनारायण ओलीले भने–‘‘दुई–तीनदिनदेखि रवाना दिने काम भईरहेको छ ।’’ सर्लाही दरबन्दी भएका सुरक्षाकर्मीहरु पनि अन्यत्रबाट आउने क्रम केही दिनमै सुरु हुने उनले अपेक्षा गरे । ‘‘आउनेहरु पनि बाटैमा आउँदै होलान् ।’’ प्रहरी निरीक्षक ओलीले भने–‘‘काजमा रहेका अधिकांशलाई पठाई सकियो, अत्यन्त जरुरी पोष्टमा रहेका केहीलाई भने रवाना दिईएको छैन ।’’
प्रहरी प्रधान कार्यालयले निर्वाचन अघि नै काजमा रहेका सुरक्षाकर्मीलाई दरबन्दी भएको स्थानमा पठाउन निर्देशन दिएपछि नेपाल प्रहरीको मुलुकभरका ईकाईमा काज फिर्ताको लहर नै चलेको छ ।