सिडिओ सहित सुरक्षा अधिकारीहरु सितामाढी जाने

सिडिओ सहित सुरक्षा अधिकारीहरु सितामाढी जाने
सर्लाही समाचारदाता
मलंगवा, कात्तिक १३ । आगामी संविधान सभा निर्वाचनको सुरक्षा व्यवस्थालाई ध्यान दिदै विहिबार नेपाली र भारतीय सुरक्षा अधिकारीहरुबीच बैठक हुने भएको छ ।
सर्लाही सहित तीन जिल्लाका सुरक्षा अधिकारी र भारतको सितामाढी जिल्लाका सुरक्षा अधिकारीहरुबीच बैठक हुने प्रमुख जिल्ला अधिकारी दिनेशकुमार घिमिरेले बताए । सितामाढीमा हुने बैठकमा महोत्तरी र रौतहटबाट पनि सुरक्षा अधिकारीहरुको सहभागिता रहनेछ । खुल्ला सिमाका कारण आगामी संविधान सभाको निर्वाचनका क्रममा हुन सक्ने आपराधिक घटनाहरु नियन्त्रण गर्नका लागि दुवै देशका सुरक्षा अधिकारीहरुबीच छलफल हुने प्रजिअ घिमिरेले बताए । हतियार ओसारपसार, अपराधिहरुले एक देशमा अपराधीक घटना गराएर अर्काे देशमा सुरक्षित ‘सेल्टर’ लिने जस्ता विषयहरुमा सुरक्षा व्यवस्थाबारे समन्वय गर्नका लागि सुरक्षा बैठक हुन लागेको बताईएको छ । १२ बजे सुरु हुने बैठकमा नेपालका तीनवटै जिल्लाबाट प्रमुख जिल्ला अधिकारी, नेपाल प्रहरी प्रमुख, सशस्त्र प्रहरी प्रमुख र राष्ट्रिय अनुसन्धानका प्रमुखहरुको सहभागिता रहने छ । बैठकले निर्वाचनको आसपासका तीन दिन सिमा क्षेत्रमा आवतजावत निषेध गर्ने लगायतका निर्णयहरु गर्ने बताईएको छ ।