अनौपचारिक कोटामा अनुगमन गरिने

अनौपचारिक कोटामा अनुगमन गरिने
सर्लाही समाचारदाता
मलंगवा, पुस ८ । जिल्लामा वितरित अनौपचारिक शिक्षा कोटामा कक्षा अवलोकन पश्चात मात्र बजेट निकासा गरिने निर्णय भएको छ ।
जिल्ला शिक्षा कार्यालयद्वारा आयोजित छलफल कार्यक्रममा सो निर्णय गरिएको हो । निमित्त स्थानिय विकास अधिकारी होमबहादुर थापाको सभापतित्वमा सहायक प्रमुख जिल्ला अधिकार प्रकाशचन्द्र अधिकारी, जिल्ला शिक्षा अधिकारी राजकुमार विश्वकर्मा, गाविस सचिव हकहित संरक्षण केन्द्रका अध्यक्ष हरिकान्तलाल कर्ण एवं सम्पूर्ण शिक्षक व्यानरका प्रतिनिधीको सहभागितामा भएको छलफलले अनौपचारीक शिक्षाको प्रतिवेदन नआएका संघ संस्थाहरुलाई बजेट रोक्का गर्ने र स्थलगत अनुगमन गरेर कक्षा संचालन भएका स्थानहरुमा मात्र रकम उपलब्ध गराउने निर्णय भएको जिल्ला शिक्षा कार्यालयका शाखा अधिकृत कर्ण बहादुर बुढाथोकीले बताए ।
कार्यक्रममा जिल्ला शिक्षा कार्यालयका प्राविधिक सहायक सुनिल कुशवाहाले जिल्लाका ११ वटै श्रोतकेन्द्रमा एकहजार दुईसय ९८ अनौपचारिक कोटा (तीनसय ९३ संस्थाका सहित) रहेको र जिल्लामा २५ हजार नौसय ६१ कुल निरक्षर रहेको प्रतिवेदन प्रस्तुत गरेका थिए ।
पछिल्लो समयमा अनौपचारिक शिक्षा तर्फको बजेट कक्षा संचालन नै नगरी दुरुपयोग भएको जनगुनासाहरु बढ्न थालेपछि सो निर्णय गरीएको र यसलाई तुरुन्त कार्यान्वयन गर्नेतर्फ अगाडी बढिएको शिक्षा कार्यालय श्रोतले जनाएको छ ।