‘अपहरित’ भनिएका साहले प्रहरीलाई जिल्याए

‘अपहरित’ भनिएका साहले प्रहरीलाई जिल्याए
सर्लाही समाचारदाता
मलंगवा, पुस ९ । अज्ञात समूहको अपहरणमा परेका भनिएका एक इट्टा व्यवसायीले प्रहरीलाई जिल्याएका छन् ।
सोमबार साँझ ७ बजेतिर सखुवा–भेल्ही क्षेत्रबाट अपहरणमा परेका भनिएका इट्टा व्यवसायी श्याम साहलाई छुटाउन जिल्ला प्रहरी कार्यालयका प्रहरी नायव उपरीक्षक सन्तोष भट्टराई मात्र हैन अस्थायी प्रहरी चौकी चन्द्रनगर, इलाका प्रहरी कार्यालय भक्तिपुर, इलाका प्रहरी कार्यालय केशरगंज र त्रिभुवननगर प्रहरी चौकीको टोली हस्याङफस्याङ गर्दै खटेको थियो । प्रहरीको टोली चौतर्फी रुपमा खटेपछि साह अपहरण मुक्त पनि भए । अपहरण मुक्त भएलगतै उनलाई उपचारका लागि जिल्ला अस्पतालमा रातभर राखियो ।
विहान अस्पतालबाट बाहिरिएका साह प्रहरीलाई कुनै खबर नगरी भारततर्फ लागेका छन् । प्रहरी नायव उपरीक्षक भट्टराईले भने–‘‘साह अपरहणमा परेको खबरले राती ११ बजेसम्म तनाव भयो, राती अस्पतालमा ल्याएर उपचारमा राख्यौं, उपचारमा भएकाले राती केही बुझ्न सकिएन, विहान त हामीलाई केही नभनी भारततर्फ पो लागेछन् ।’’ हाल जिल्ला प्रहरी कार्यालय साह अपहरणमा परेको हो की हैन भन्नेमै द्वुविधामा रहेको छ । ‘‘अपहरणमा परेका हुन की हैनन् भन्ने नै एकिन हुन सकेन ।’’ प्रनाउ भट्टराईले मंगलबार राती सर्लाही दैनिकसँग भने–‘‘हिजो राती अस्पतालमा स्लाईन चढाएर राखेको मान्छे त आज विहानै सम्पर्कै नगरी भारततर्फ लागेछन् ।’’