‘कृत्तिम शक्तिले संविधान निर्माणमा संकट’

‘कृत्तिम शक्तिले संविधान निर्माणमा संकट’
सर्लाही समाचारदाता
मलंगवा, मङ्सिर १५ । तराई मधेस सदभावना पार्टी (तमसपा) नेपालका अध्यक्ष महेन्द्र राय यादवले संघीयता विरोधी दुई दलको कृत्रिम शक्तिले संविधान निर्माणमा संकट ल्याउने बताएका छन् ।
शनिबार लोकतान्त्रिक शिक्षक फेड्रेशनले आÇनो सम्मानमा आयोजना गरेको बधाई कार्यक्रममा बोल्दै तमसपा नेपालका अध्यक्ष यादवले नया निर्वाचनबाट संघीयता बिरोधी एमाले र काँग्रेसको कृत्रिम शक्तिको उदय भएको बताए । यादवले भने–‘‘संघियता विषयमा सहमति नहुदा विगतमा संविधान सभा विघटन भयो । संघियताको विरोध गर्ने नै ठुलो दल भनेकोले संविधान निर्माणमा संकट छ ।’’
परिवर्तनका पक्षधर एमाओवादी र मधेसवादी दलहरुको पराजयका कारण संघीयता सहितको संविधान निर्माण संकट परेको यादवले बताए । ‘‘संघियता बिरोधिलाई पनि दुई तिहाइ नभएकाले सहमतिको विकल्प छैन ।’’ उनले भने–‘‘संविधान निमार्णमा सहमति नभए कठिन मोडमा रहेको देशमा संकट र गृहयुद्ध निम्तिन सक्छ ।’’
एमाओवादीको ढुलमुढे शैली र मधेसी दलको फुटले परिवर्तनका पक्षधर शक्ति कमजोर हुँदा संघीयता सहितको संविधान निर्माणमा संकट उत्पन्न भएको अध्यक्ष यादवले बताए । चुनाव अघि मोर्चा बन्दी हुन नसकेको संघियता पक्षधरको अब मोर्चाबन्दी हुनु पर्नेमा उनले जोड दिए ।
सदरमुकाम मलंगवा स्थित शिक्षक भवनमा फेड्रेशनका वयोवृद्ध सदस्य बलराम रायको सभापतित्वमा आयोजित कार्यक्रममा फेड्रेशनका अध्यक्ष रामेश्वर प्रसाद यादव लगायत वक्ताहरुले शिक्षा क्षेत्रको हित हुने गरी नयाँ संविधान जारी गर्नका लागि पहल गर्न नव निर्वाचित सभासद् एवं तमसपा अध्यक्ष यादवसमक्ष आग्रह गरेका थिए । शिक्षक लगायत शिक्षा सम्बद्ध व्यक्तित्वहरुले शिक्षा नीति सेवा मुलक नभएको गुनासो गरे ।