आन्दोलनको निर्णय गर्न मतदान

आन्दोलनको निर्णय गर्न मतदान
सर्लाही समाचारदाता
हरिवन, मङ्सिर ११ । संविधान सभाको दोश्रो निर्वाचन सकिए लगतै यसको नक्कल अन्य क्षेत्रमा पनि पर्न थालेको छ ।
महत्वपूर्ण कार्यका लागि मतदानको प्रयोग गर्ने परिपाटीलाई पच्छ्याउँदै हरिवन स्थित एक उद्योगका मजदुर÷कामदार, कर्मचारीले आन्दोलन गर्ने वा नगर्ने बारे गोप्य मतदान मार्फत राय संकलन गरेको हो ।
हरिवन स्थित इन्दुशंकर चिनी उद्योगका मजदुर, कामदार र कर्मचारीले गोप्य मतदानबाट आन्दोलनको पक्षमा मतदान गरे ।
उद्योगमा कार्य गर्ने कर्मचारी, मजदुर÷कामदारले विभिन्न नौ सुत्रिय माग पुरा हुनुपर्ने मागका साथ आन्दोलन गर्नका लागि मतदान प्रणालीबाट सबैको राय बुझ्ने प्रक्रिया गरेको बताइएको छ । उद्योगका कामदार÷कर्मचारी विनय कर्णका अनुसार श्रमऐन २०४८ को दोश्रो संसोधन २०५४ को दफा ७६ बमोजिमको नियमबाट पारिश्रमिक एवं सुविधा वृद्धिका लागि ट्रेड यूनियन महासंघमा आवद्ध कामदारले माग गर्दै आन्दोलनमा उत्रने चेतावनी दिएका हुन ।
ट्रेड यूनियनमा आवद्ध ३ सय ८३ जना कर्मचारी मध्ये २ सय ७५ जना मतदानमा सहभागि भएका र आन्दोलनको पक्षमा २ सय ६१, नगर्ने पक्षमा १३ र १ मत बदर भएको थियो ।
आफ्ना सेवा सुविधा वृद्धिको माग सहित मंगलबारको मतदानको निर्णय अनुसार ३० दिने अल्टिमेटम (उद्योगलाई) दिइएको र सो अवधिमा माग पुरा नभए आन्दोलन गर्ने कर्णले जानकारी दिए ।