सर्लाही समाचारदाता
हरिपुर, मङ्सिर ११ । शरिरभरी गाँजा प्याक गरेर तथा झोलामा बोकेको अवस्थामा पक्राउ परेका तीनजना महिलालाई प्रहरीले जिल्ला अदालतबाट म्याद थप गरेर कार्वाही प्रकृया अगाडी बढाएको छ ।
ईलाका प्रहरी कार्यालय हरिपुरले मंगलबार जिल्ला अदालतबाट १० दिने म्याद लिएर ती महिलाहरुमाथि कार्वाही प्रकृया अगाडी बढाएको हो । गत सोमबार सशस्त्र प्रहरीले तीनजना महिलालाई नयाँरोड–बरहथवा सडकखण्ड अन्तर्गत धरहरामा चेकजाँचका क्रममा करिब १० केजी गाँजा सहित तीनजना महिलालाई पक्राउ गरेको थियो । ना. १ ज २६४४ नम्बरको म्याजिक भ्यानमा नयारोडबाट बरहथवातर्फ गईरहेको अवस्थामा सक्रौल गाविस–९ निवासी करिब ३५ वर्षिया निर्मली सहनी, करिब ४० वर्षिया मनिता सहनी र करिब ४५ वर्षिया जक्तारण सहनी पक्राउ परेका हुन् ।
निर्मलीले भित्रबाट गाँजा राखेर बनाईएको कपडाको भोटो लगाएकी थिइन् भने मनिता गाँजा प्याक गरेर बनाईएको पोटुका पेटमा बाँधेको अवस्थामा फेला परेकी थिईन् । जक्तारणको शरिरबाट भने गाँजा फेला परेको थिएन । उनीहरु तीनैजनाले छुट्टाछुट्टै झोलामा समेत गाँजा बोकेका थिए ।
शरिरमा प्याक गरिएको गाँजा अरुले नदेखुन् भनेर पक्राउ परेका महिलाहरुले ठूला–ठूला ओड्ने समेत ओडेका थिए । आफूहरुलाई १–१ हजार दिन्छु भनेर अर्कै व्यक्तिले भारतसम्म गाँजा बोक्न लगाएको ती महिलाहरुले दावी गरेका छन् ।
No comments:
Post a Comment