उखुको मूल्य बढाउन माग

उखुको मूल्य बढाउन माग
सर्लाही समाचारदाता
हरिवन, मङ्सिर १३ । उखुको मूल्य बढाउन माग गर्दै मिलगेट उखु उत्पादक समिति हरिवनले विहिबार इन्दु शंकर चिनी उद्योगमा ज्ञापन पत्र बुझाएको छ ।
चालु सिजनमा उखुको मूल्य प्रति क्वीन्टल ६ सय २५ रुपैया हुनुपर्ने माग राखेर समितिले उद्योगका महाप्रबन्धक विजयकान्त झालाई ज्ञापन पत्र बुझाएको हो । गतवर्ष ४ सय ८१ रुपैया प्रतिक्वीन्टल रहेकामा उत्पादन लागत बढेको र अन्य विभिन्न नगदे तथा खाद्यान्न बालीको मूल्य समेत बढेकाले उखुको मूल्य बढाईनुपर्ने मागका साथ ज्ञापन पत्र बुझाईएको समितिका अध्यक्ष बेदबहादुर बुढाथोकीले बताए ।
उखु प्रबन्धत योगनारायण रजकका अनुसार उद्योगले आगामी मंसिर १९ गते डोंगा पूजा तय गरिसकेको छ । डोंगा पूजा गरेपछि उद्योग सञ्चालनको लागि तयार भएको बुझिन्छ ।
सर्लाहीमा झण्डै १७ हजार हेक्टर भन्दा बढी क्षेत्रफलमा उखु खेती हुने गरेको जिल्ला कृषि विकास कार्यालयले जनाएको छ । इन्दु शंकरले वर्षेनी ३० लाख क्वीन्टल हाराहारीमा उखु क्रसिङ्ग गर्ने गरेको छ ।