इन्दुशंकर चाँडै चल्ने

इन्दुशंकर चाँडै चल्ने
सर्लाही समाचारदाता
हरिवन, पुस १० । इन्दु शंकर चिनी उद्योगका महाप्रबन्धक विजयकान्त झाले केही दिनभित्रै उद्योग सञ्चालनमा आउने बताएका छन् ।
उखु किसान र चिनी उद्योगपतिबीच तत्काल उद्योग सञ्चालन गर्ने सहमति भएकाले सोही अनुसार उद्योग सञ्चालनका लागि तयारी सुरु गरिएको महाप्रबन्धक झाले बताए । ‘‘हामी तयार हालतमा छौं ।’’ उनले बुधबार सर्लाही दैनिकसँग भने–‘‘अहिले मजदुरहरुको आन्दोलनका कारण केही कठिनाई देखिएको छ, वार्ता गरेर समस्या समाधानको प्रयास गर्दैछौं, समाधान हुने वितिकै उद्योग सञ्चालन गर्नेछौं ।’’
नेटपूर्जीमा शुन्य मूल्य राखेर तत्काल उद्योग सञ्चालन गर्ने र माघ मसान्त भित्र अर्को वार्ता गरी मूल्यतयबारे सहमति गर्ने बुधबारको चिनी उद्योगी र किसान प्रतिनिधिहरुको बैठकले निर्णय गरेको थियो । तेस्रो वर्षे खुट्टी उखु काट्न ढिलाई हुँदा किसानहरु मर्कामा पर्दै आएका छन् ।
इन्दुशंकरले गत मंसिर १९ गते नै डोंगा पूजा गरेर उद्योग सञ्चालनका  लागि तयार अवस्थामा रहेको संकेत गरिसकेको छ । गतवर्ष पुस ३ गते नै उद्योग सञ्चालनमा आईसकेको थियो । यसवर्ष उद्योगको क्षमता समेत बढाईएको महाप्रबन्धक झाले बताए । गतवर्षसम्म ३० हजार क्वीन्टल दैनिक क्रसिङ क्षमता रहेको इन्दु शंकर चिनी उद्योगले यसवर्ष दैनिक ५० हजार क्वीन्टल क्रसिङ क्षमता पु¥याएको छ ।