सिडिओ र एसपी अदालतमा जवाफ दिन गए

सिडिओ र एसपी अदालतमा जवाफ दिन गए
सर्लाही समाचारदाता
मलंगवा, पुस १० । क्षेत्र नं. ६ मा धाँधली भएको भन्दै संविधान सभा अदालतमा परेको उजुरी उपर जवाफ दिन जिल्लाका सुरक्षा अधिकारीहरु काठमाण्डौतर्फ लागेका छन् ।
प्रमुख जिल्ला अधिकारी दिनेशकुमार घिमिरे, प्रहरी उपरीक्षक (एसपी) रविन्द्रबहादुर धानुक लगायत अन्य सम्बन्धित निकायका प्रमुखहरु उजुरीउपर जवाफ पेश गर्न काठमाण्डौतर्फ लागेका हुन् । प्रजिअ घिमिरे, प्रहरी उपरीक्षक धानुक लगायत सुरक्षा अधिकारीहरु बुधबार विहान काठमाण्डौतर्फ लागेका हुन् ।
संविधान सभा सदस्यको निर्वाचन २०७० मा तराई मधेश सद्भावना पार्टीको तर्फबाट क्षेत्र नं. ६ का उम्मेद्वार शिवपुजन रायले निर्वाचनमा धाँधली भएको दावी सहित उक्त निर्वाचन बदरको माग राखेर गत मंसिर २४ गते उजुरी हालेका थिए । रायले ६ नं. क्षेत्रमा निर्वाचित भएका नेपाली कांग्रेसका उम्मेद्वार डा. अमरेशकुमार सिंह, निर्वाचन आयोग, जिल्ला निर्वाचन कार्यालय मलंगवा, मुख्य निर्वाचन अधिकृतको कार्यालय, ६ नं. क्षेत्रीय निर्वाचन अधिकृतको कार्यालय, जिल्ला प्रशासन कार्यालय, जिल्ला प्रहरी कार्यालय, नेपाली सेनाको खैर्वा स्थित अस्थायी क्याम्प तथा त्यसका प्रमुख लगायतलाई विपक्षी बनाएर निर्वाचनमा धाँधली गरेको भन्दै उजुरी हालेका थिए ।
उजुरीका विपक्षी निकायहरुलाई जवाफ पठाउन भन्दै संविधान सभा अदालतले पठाएको पत्र गत साता जिल्लाका म्बन्धित निकायहरुमा आईपुगेको थियो । अदालतले उजुरीमा विपक्षी बनाईएकाहरुलाई बाटोको म्याद बाहेक सात दिनभित्र लिखित जवाफ पेश गर्न भन्दै पत्र पठाएको हो ।
उजुरीकर्ता रायले नेपाली कांग्रेसका उम्मेद्वार सिंहले निर्वाचनका क्रममा मतदानको दिन मतदाताहरुलाई कुटपीट एवं गोली प्रहार गरि घाईते बनाईएको र विभिन्न मतदान केन्द्र कब्जामा लिएर  मतपत्रमा एकतर्फी छपाई गरेको दावी गर्दै उजुरी हालेका हुन् । उक्त कार्यमा सहयोग पु¥याएको दावी गर्दै उनले विभिन्न सरकारी एवं आयोग सम्बद्ध निकायलाई पनि विपक्षी बनाएका हुन् ।