चलान पुर्जी बाँडेपछि उखु खेतमा मारामार

चलान पुर्जी बाँडेपछि उखु खेतमा मारामार
सर्लाही समाचारदाता
हरिवन, पुस १४ । इन्दु शंकर चिनी उद्योगले उखु ल्याउनका लागि चलानपूर्जी वितरण गरेपछि किसानहरुले उखु काट्न सुरु गरेका छन् ।
तेस्रो वर्षे खुट्टी उखु काट्न ढिलाई भईसकेकाले किसानहरु त्यस्तो उखु काट्न हतारिएका छन् । उखुको मूल्य विषयमा उद्योगपति र किसान प्रतिनिधिहरुबीच कुरा नमिल्दा चिनी उद्योग सञ्चालनमा भएको ढिलाईले किसानहरु चिन्तित बन्दै आएका थिए । उद्योगले चलानपूर्जी वितरण सुरु गरेपछि हाल जिल्लाभर उखु काट्न किसानहरुबीच तँछाडमछाड सुरु भएको छ । इन्दु शंकर चिनी उद्योग हरिवनले सोमबार विहानबाट उखु क्रसिङ गर्दैछ ।
‘‘आज राती २ बजेबाट उद्योग सञ्चालनको साईरन बजाउँछौं ।’’ आइतबार राती सर्लाही दैनिकसँग विजयकान्त झाले भने–‘‘भोली विहानबाट उखु क्रसिङ सुरु हुन्छ ।’’ चार दिनअघि नै उद्योगले उखु ल्याउन किसानलाई चलानपूर्जी वितरण सुरु गरेको भएपनि पर्याप्त उखु जम्मा नभएकाले उद्योग सञ्चालनमा ढिलाई भएको महाप्रबन्धक झाले बताए । झाका अनुसार कम्तिमा १० हजार क्वीन्टल उखु जम्मा भएपछि मात्र उद्योग सञ्चालन गरिनेछ । वर्षहरुमा दैनिक ३० हजार क्वीन्टल क्रसिङ गर्दै आएको उद्योगले यसवर्ष ५० हजार क्वीन्टल पु¥याएको छ । ‘‘उद्योगलाई दैनिक ५० हजार क्वीन्टल उखु क्रसिङ गर्ने क्षमतामा पु¥याएका छौं ।’’ महाप्रबन्धक झाले भने–‘‘कम्तिमा दैनिक ४० देखि ४५ हजार क्वीन्टल उखु क्रसिङ हुन्छ ।’’
यसवर्ष ४० लाख क्वीन्टल भन्दा बढी उखु क्रसिङ गर्ने लक्ष्य राखिएको समेत महाप्रबन्धक झाको कथन छ । गतवर्ष पुस ३ गतेबाट सञ्चालनमा आएको सो उद्योगले त्यस सिजनमा २६ लाख ५० हजार क्वीन्टल उखु क्रसिङ गरेको थियो ।