बलात्कार आरोपी प्रहरीमाथि थुनछेक सुरु

बलात्कार आरोपी प्रहरीमाथि थुनछेक सुरु
सर्लाही समाचारदाता
मलंगवा, पुस १४ । सदरमुकाम मलंगवामा एक किशोरीलाई सामुहिक बलात्कार गरेको आरोपमा पक्राउ परेका तीनजना प्रहरी विरुद्ध थुनछेकको प्रकया अगाडी बढेको छ ।
जिल्ला प्रहरी कार्यालयका अनुसार प्रहरी जवानहरु संजीत कार्की, राजकुमार फुयाँल र अरवीन्द महतोलाई गत शुक्रबार जिल्ला अदालतमा पेश गरिएको हो । जिल्ला न्यायाधिश शंकरराज बरालले उक्त मुद्धा हेरिरहेको जिल्ला अदालत स्रोतले बतायो । ‘‘मुद्धामा थुनछेकको बहस लगायत प्रकृया सुरु भएको छ ।’’ अदालतका स्रोतले भन्यो–‘‘सम्भवतः आगामी मंगलबार श्रीमानबाट आदेश हुन्छ होला ।’’
गत मंसिर १८ गते मंगलबार विहानदेखि १९ गते बुधबार विहानसम्म सदरमुकाम मलंगवा स्थित विभिन्न लज र भारतको सोनवर्षामा समेत एक किशोरीमाथि सामुहिक रुपमा जबर्जस्ती करणी भएको भन्दै किटानी जाहेरी परेपछि सो कार्यमा संलग्न भएको आरोपमा तीनजना प्रहरीहरु पक्राउ परेका हुन् । सिन्धुपाल्चोक निवासी पीडित किशोरीको भनाईका आधारमा महिला तथा बालबालिका कार्यालय मलंगवा अन्तर्गत महिला शान्ति केन्द्रले गत शुक्रबार तीनजना प्रहरी एवं रात्रीबसका मजदुरहरुको केही नाम सहित १२ जनाले सामुहिक बलात्कार गरेको भन्दै किटानी जाहेरी दिएको थियो । किटानी जाहेरीमा नाम उल्लेख भएका अन्य भने फरार रहेको जिल्ला प्रहरी कार्यालयले जनाएको छ ।
मंसिर १९ गते बुधबार हिमालय लजबाट उद्धार गरिएकी ति किशोरीलाई महिला तथा बालबालिका कार्यालयले एकसातासम्म आश्रय दिएर राखेको थियो । घर जान नमानेपछि उनलाई काठमाण्डौ स्थित शक्ति समूहको संरक्षणमा रहने गरी पठाईएको छ । आÇनै दाजु लिन आएपनि किशोरीले घर जान नमानेपछि उनलाई लालनपालन एवं शिक्षा लगायत संरक्षण दिने जिम्मेवारी सहित शक्ति समूहले संरक्षणमा लिएको हो ।
करिब १६ वर्षिया उनलाई मलंगवा–काठमाण्डौ चल्ने रात्रीबसका एक मजदुरले काठमाण्डौबाट फकाएर मलंगवा ल्याएको र दुईदिनसम्म जबर्जस्ती करणी गरेको बताईएको छ ।