एमालेका सात जनामा तीन छानिए

एमालेका सात जनामा तीन छानिए
सर्लाही समाचारदाता
हरिवन, पुस १३ । नेकपा एमालेको समानुपातिक सभासद्मा सर्लाहीबाट तीनजना परेका छन् । सर्लाहीबाट ७ जना समानुपातिक उम्मेद्वार रहेपनि ३ जनामात्र सभासद्मा चयन भएका हुन् ।
शुक्रबार साँझ अवेर सम्पन्न एमाले स्थायी कमिटीको बैठकले गरेको निर्णय अनुसार सर्लाहीबाट तीनजना महिला परेका हुन् । नेकपा एमालेकी वैकल्पिक केन्द्रीय सदस्य कमलादेवी महतो, एमाले सम्बद्ध युवा संघकी केन्द्रीय सदस्य रञ्जना सरकार र एमाले सम्बद्ध नेपाल उत्पीडित जातिय मुक्ति समाजकी जनकपुर अञ्चल सदस्य दुलारी गिरी एमालेको समानुपातिक सभास्दको सिफारिस सूचीमा परेका हुन् ।
क्षेत्र नं. ५ अन्तर्गत सिमरा भगवतीपुर निवासी महतो एमालेमा लामो समयदेखि अनवरत लागि परेकी महिला नेतृ हुन् भने क्षेत्र नं. २ अन्तर्गत हरिपुर निवासी सरकार यूवा आन्दोलन लगायतमा पार्टीमा सकृय नेतृ हुन् । त्यस्तै क्षेत्र नं. ४ अन्तर्गत ब्रम्हपुरी निवासी गिरी एमाले अन्तर्गत दलित आन्दोलनमा सकृय जुझारु महिला नेतृ हुन् । महतोलाई लामो समयदेखि निरन्तर पार्टीका लागि योगदान दिएको मधेशी महिला, सरकारलाई अल्पसंख्यक एवं पार्टीको भातृ संगठन युवा संघको क्षेत्रमा सकृय र गिरीलाई दलित महिला नेतृको भूमिका निर्वाह गरेकाले समानुपातिक सभासद्भा सिफारिस गरिएको एक एमाले नेताले बताए ।
एमालेले सर्लाहीबाट ७ जनालाई समानुपातिक सभासद्मा उम्मेद्वार बनाएको थियो । सर्लाहीबाट ५० जनाभन्दा बढी सिफारिस भएपनि एमालेको समानुपातिक उम्मेद्वारको अन्तिम सूचीमा ७ जना परेका थिए । जसमा वैल्कल्पिक केन्द्रीय सदस्य समेत रहेका रविन्द्र वैठा, जनकपुर अञ्चल कमिटी सचिव लक्ष्मण पौडेल, हरिपुरका सुमन धामी र मूर्तियाकी रमा कुशवाहा लगायतको पनि समानुपातिकको अन्तिम सूचीमा नाम पनि रहेको थियो । कुशवाहा डा. सियाराम कुशवाहाकी श्रीमति हुन् ।
वैठाले चुनावको समयमा आÇनो गृह क्षेत्र नं. ४ का उम्मेद्वार राजनारायण साहलाई उचित सहयोग नगरेको भन्दै समानुपातिक सभासद्मा चयन नगरेको एमाले स्रोतले बतायो । वैठाले क्षेत्र नं. ४ बाट एमालेका पूर्व नेता एवं हाल तराई मधेश सद्भावना पार्टी नेपालका राष्ट्रिय अध्यक्ष रहेका महेन्द्र राय यादव उम्मेद्वारमा खडा भएपछि पार्टीका उम्मेद्वार साहलाई सहयोग नगरेको बताईएको छ । ‘‘वैठालाई पहिलापनि पार्टीले उचित अवसर दिईसकेको थियो ।’’ स्रोतले भन्यो–‘‘अहिलेपनि फेरी सभासद्मा चयन गथ्र्यो होला, तर उनले पार्टीका उम्मे्वारलाई गद्धारी गरेकाले सभासद्मा नपरेका हुन सक्छन् ।’’
त्यस्तै एमालेका पूराना नेता एवं जनकपुर अञ्चल सचिव लक्ष्मण पौडेललाई भने अन्य कुनै अवसर उपलब्ध गराईदिने प्रलोभन दिएर छनौटमा नपारिएको एमाले स्रोतले बतायो । ‘‘सभासद् भन्दा धेरै शक्तिशाली र राम्रो पदमा पौडेललाई अवसर दिने नेतृत्वले बचन दिएको छ ।’’ एमाले स्रोतले भन्यो–‘‘त्यसैले उनी समानुपातिक उम्मेद्वारको सूचीमा परेपनि सभासद्मा भने परेनन् ।’’
त्यस्तै धामी र कुशवाहालाई जातिय लगायत कारणले मात्र पार्टीले समानुपातिक उम्मेद्वारको सूचीमा राखेकाले सभासद्मा नाम सिफारिस नगरेको पार्टीका एक कार्यकर्ताले बताए । ‘‘उनीहरुको पार्टीमा खासै ठूलो योगदान थिएन ।’’ ती कार्यकर्ताले भने–‘‘त्यसैले समानुपातिक सभासद्मा परेनन् ।’’ जम्मा ८४ जना समानुपातिक सभासद्का लागि सर्लाहीबाट मात्रै ३ जना पर्नुमा पार्टीले सर्लाहीलाई ठूलै महत्व दिएको एक एमाले नेताले बताए ।