अधिकांश उम्मेद्वरले खर्च विवरण बुझाएनन्

अधिकांश उम्मेद्वरले खर्च विवरण बुझाएनन्
टंकबहादुर क्षेत्री÷सर्लाही दैनिक
मलंगवा, पुस १४ । संविधान सभा सदस्यको निर्वाचन २०७० मा सर्लाहीबाट भाग लिएका प्रत्यक्षतर्फका अधिकांश उम्मेद्वारहरुले आचारसंहिता अनुसार आ–आÇनो खर्च विवरण बुझाएनन् । मत परिणाम घोषणा भएको ३५ दिनभित्र जिल्ला निर्वाचन कार्यालयमा उम्मेद्वारहरुले आ–आÇनो खर्च विवरण बुझाउनु पर्ने संविधान सभा निर्वाचन–२०७० को आचारसंहितामा उल्लेख छ । जसअनुसार सर्लाहीमा पुस १२ गतेभित्र उम्मेद्वारहरुले खर्च विवरण बुझाईसक्नु पर्ने हुन्छ । तर आइतबारसम्म ६६ जना उम्मेद्वारले मात्र खर्च विवरण बुझाएको जिल्ला निर्वाचन कार्यालयले जनाएको छ । मुलुकको मूल कानून संविधान बनाउन प्रतिष्पर्धामा उत्रिएका उम्मेद्वारहरुले निर्वाचन आयोगको आचारसंहिताको पालना नगरेर ‘लज्जाजनक’ व्यवहार देखाएका छन् ।
जिल्लाका ६ वटै क्षेत्रमध्ये क्षेत्र नं. २ को सबैभन्दा ढिला मंसिर ८ गते मतपरिणाम घोषणा भएको थियो । अन्य क्षेत्रको त त्यसअघि नै घोषणा भएको थियो । प्रत्यक्षतर्फ सभासद्भा निर्वाचित ६ वटै क्षेत्रका उम्मेद्वारहरुले खर्च विवरण बुझाएका छन् भने ४ जना राष्ट्रिय अध्यक्षहरुले पनि बुझाएका छन् ।
क्षेत्र नं. १ का शम्भुलाल श्रेष्ठले ९ लाख ९५ हजार ७ सय २८, क्षेत्र नं. २ का रामचन्द्र चौधरीले ८ लाख ७६ हजार, क्षेत्र नं. ३ का हरि प्रसाद उप्रेतीले ९ लाख ९६ हजार एकसय २५, क्षेत्र नं. ४ का महेन्द्र राय यादवले ८ लाख ३९ हजार ८ सय, क्षेत्र नं. ५ का जंगीलाल रायले ९ लाख ९३ हजार र क्षेत्र नं. ६ का डा. अमरेशकुमार सिंहले ९ लाख ४४ हजार एकसय ९७ रुपैंया खर्च भएको विवरण पेश गरेका छन् । क्षेत्र नं. ४ मा प्रतिष्पर्धी उम्मेद्वारहरुबाट पैसाको खोलो नै बगाईएको चर्चा चलेपनि त्यहाँबाट निर्वाचित भएका तराई मधेश सद्भावना पार्टी नेपालका राष्ट्रिय अध्यक्ष समेत रहेका यादवले जिल्लामा विजयी भएका उम्मेद्वारहरुमध्ये सबैभन्दा कम खर्च भएको विवरण पेश गरेका छन् ।
त्यस्तै क्षेत्र न.ं १ का उम्मेद्वार नेकपा एमालेका राष्ट्रिय अध्यक्ष झलनाथ खनालको ९ लाख ९६ हजार, क्षेत्र नं. ६ का तराई मधेश लोकतान्त्रिक पार्टीका राष्ट्रिय अध्यक्ष महन्थ ठाकुरको ८ लाख ५१ हजार, क्षेत्र नं. ४ का सद्भावना पार्टीका राष्ट्रिय अध्यक्ष राजेन्द्र महतोको ९ लाख ७५ हजार ४ सय खर्च विवरण पेश भएको छ ।
त्यस्तै सद्भावनाका क्षेत्र नं. ५ का प्रमोद साहले ८ लाख ३१ हजार, कांग्रेसकी शुशिला कार्कीले ९ लाख ९५ हजार, तमसपाकी किरणकुमारी रायले ९ लाख ८७ हजार ५ सय ५०, एमाओवादीका क्षेत्र नं. ३ का भरतकुमार थापाले ४ लाख ५० हजार १ सय, तमसपाका क्षेत्र नं. ६ का शिवपुजन रायले ८ लाख ५१ हजार, कांग्रेस सर्लाहीका सभापति एवं क्षेत्र नं. ४ का उम्मेद्वार लक्ष्मण रायले ३ लाख १३ हजार ५ सय, सद्भावनाका क्षेत्र नं. १ का रुपनारायण सिंहले ८ लाख ९७ हजार १ सय ७५ रुपैंया खर्च भएको विवरण पेश गरेका छन् ।
त्यस्तै चुरे भावर लोकतान्त्रिक पार्टीबाट क्षेत्र नं. ३ बाट खडा भएकी संगीता वाग्लेले ८ लाख ३४ हजार १ सय ६५, तमलोपाका क्षेत्र नं. २ का विनयकुमार कर्णले ७ लाख ९९ हजार १ सय, कांग्रेसकी क्षेत्र नं. ३ की मिना पाण्डेले ८ लाख ९९ हजार, राप्रपा नेपालका क्षेत्र नं. ४ का इस्लाम मन्सुरीले ९ लाख ४० हजार, एमालेका क्षेत्र नं. २ का सुरेन्द्र लामाले ९ लाख ९६ हजार १ सय, कांग्रेसका क्षेत्र नं. ५ का नागेन्द्रकुमार रायले ५ लाख ८८ हजार रुपैया खर्च विवरण पेश गरेका छन् । स्वतन्त्र सहित सर्लाहीबाट २ सय ५५ जनाले उम्मेद्वारी दिएका थिए । जसमध्ये ६६ जनाले मात्र आचारसंहिताको पालना गर्दै खर्च विवरण बुझाएका छन् भने बाँकी १ सय ८९ जनाले आचासंहिताको उल्लंघन गरेका छन् ।
संविधान सभा निर्वाचन २०७० को आचार संहितामा प्रत्यक्षतर्फका उम्मेद्वारले अधिकतम १० लाख रुपैंया खर्च गर्न पाउने व्यवस्था रहेको छ । तर जिल्ला स्थित कतिपय उम्मेद्वारहरुले करोडौं खर्च गरेको समेत चर्चामा आएको छ । समयभित्र खर्च विवरण नआएको बारे आयोगमा सम्पर्क गरेर आवश्यक कार्वाही प्रकृया अगाडी बढाईने जिल्ला निर्वाचन कार्यालयका प्रमुख प्रकाश अधिकारीले बताए ।