सभासद् भन्छन–“हामी बन्धक बन्दैनौं”

सभासद् भन्छन–“हामी बन्धक बन्दैनौं”
सर्लाही समाचारदाता
लालबन्दी, पुस १० । संविधान सभा निर्वाचन २०७० अन्तर्गत प्रत्यक्षतर्फ निर्वाचित भएका जिल्ला स्थित सभासद्हरुले तोकिएको समयसिमा भित्र लोकतान्त्रिक संविधान निर्माणका लागि सकृय भूमिका निर्वाह गर्ने बताएका छन् । बुधबार लालबन्दीमा आयोजित नयाँ संविधान र मानव अधिकार प्रवचन गोष्ठीमा बोल्दै सभासद्हरुले ठूला नेताहरुको बन्धक नहुने र आगामी दिनमा जनताको चाहना अनुसार संविधान निर्माणमा सकृय भूमिका निर्वाह गर्ने समेत प्रतिबद्धता जनाए । ‘‘अब हामी कसैको बन्धक हुँदैनौं ।’’ सभासदहरुको धारणा थियो–‘‘समयसिमा भित्र मुलुकलाई नयाँ संविधान दिनका लागि सकृय भूमिका निर्वाह गर्दछौं र त्यसका लागि नेतृत्वलाई समेत दवाव दिनेछौं ।’’
बुधबार एम्नेष्टी इन्टरनेशनल नेपाल शाखा काठमाण्डौ, एम्नेष्टी इन्टरनेशनल लालबन्दी समूह ७८ लालबन्दी, शान्तिद्विप युथ नेटवर्क लालबन्दी र जनज्योती युथ नेटवर्क लालबन्दीको संयुक्त आयोजनामा भएको प्रवचन गोष्ठीमा बोल्दै सभासद्हरुले सो प्रतिबद्धता जनाएका हुन् । कार्यक्रममा बोल्दै क्षेत्र नं. १ बाट निर्वाचित सभासद् शम्भुलाल श्रेष्ठले तोकिएको समयसिमा भित्र मुलुकलाई नयाँ संविधान दिनका लागि पार्टीको नेतृत्वमा दवाव दिने बताए । ‘‘हामीलाई गुमराहमा राखेर संविधानबारे अमुक व्यक्तिहरुले गर्ने निर्णय मान्दिन ।’’ एकिकृत नेकपा माओवादीबाट निर्वाचित उनले भने–‘‘जनताले दिएको म्याण्डेट अनुसार नयाँ संविधान निर्माणका लागि सकृय हुनेछु, र नेतृत्वलाई समेत त्यस अनुसारको दवाव दिनेछु ।’’ आम नेपाली जनताको मानव अधिकारको रक्षाप्रति आफू प्रतिबद्ध रहेको समेत उनले बताए ।
क्षेत्र नं. ३ बाट निर्वाचित सभासद् हरि उप्रेतीले राजनैतिक, आर्थिक, सामाजिक, लैंगिक लगायत सबै प्रकारले विभेदमा परेका वर्गको हित हुनेगरी नयाँ संविधान निर्माणमा सकृय हुने र पार्टी नेतृत्वलाई समेत दवाव दिने प्रतिबद्धता जनाए । ‘‘सबैखालका विभेदहरुलाई सम्बोधन गर्ने गरी नयाँ संविधान निर्माणमा सकृय भूमिका निर्वाह गर्नेछु ।’’ नेकपा एमालेबाट निर्वाचित उप्रेतीको भनाई थियो–‘‘पार्टीका नेताहरु मुलुक अनि जनचाहना विपरित फेरी पनि दलिय भागवण्डामा लागे भने बरु राजीनामा दिनेछु ।’’ उप्रेतीले आफू जागिर खाने भन्दा पनि जनताको आकांक्षा पूरा गर्नेतर्फ दृढ रहेको दावी गरे । आम नेपाली जनताको आधारभूत आवश्यक्ता परिपूर्ति गर्नका लागि पहलकदमी गर्दै मानव अधिकारको संरक्षणमा प्रतिबद्ध रहेको समेत उप्रेतीले बताए ।
क्षेत्र नं. २ बाट निर्वाचित सभासद् रामचन्द्र चौधरीले आम जिल्लाबासी एवं जनताको चाहना अनुरुप संविधान निर्माणमा पहल गर्ने प्रतिबद्धता जनाए । ‘‘जनताले दिएको जिम्मेवारी पूरा गर्नका लागि प्रतिबद्ध छु ।’’ नेपाली कांग्रेसबाट निर्वाचित चौधरीले भने–‘‘मानव अधिकारको प्रत्याभूति सहितको लोकतान्त्रिक संविधान निर्माणमा लागि पर्नेछु ।’’
सुरेन्द्र न्यौपानेको सञ्चालन रहेको कार्यक्रममा एम्नेष्टी इन्टरनेशनल नेपालका उपाध्यक्ष सूर्यबहादुर अधिकारी, पूर्व अध्यक्ष कृष्ण कँडेल लगायत आधा दर्जन केन्द्रीय पदाधिकारीहरुले मानव अधिकारको संरक्षण र आगामी संविधानमा त्यसको प्रत्याभूति दिलाउने सवालमा सबै पक्ष, तह र तप्का गम्भिर हुनुपर्ने बताए । कार्यक्रममा शुशिल शर्मा, राधा घिमिरे, मुना उपाध्याय लगायत एक दर्जन भन्दा बढी स्थानीय राजनैतिक व्यक्तित्व, अधिकारकर्मी लगायतले बोलेका थिए । होटल साईनोमा भएको कार्यक्रममा नेकपा एमालेका अध्यक्ष मनोज देवकोटा, नेपाली कांग्रेसका वयोवृद्ध नेता बासुदेवशरण कोइराला लगायतको उपस्थिती रहेको थियो । कार्यक्रममा जिल्लाका सबै क्षेत्रबाट निर्वाचित सभासद्हरुलाई निमन्त्रणा गरिएको भएपनि तीनजनाको मात्र उपस्थिती भएको एमनेष्टी इन्टरनेशनल नेपाल शाखाका केन्द्रीय सदस्य चेतबहादुर मगरले बताए ।