इन्दुशंकरमा तलब भत्ता बढ्यो

इन्दुशंकरमा तलब भत्ता बढ्यो
सर्लाही समाचारदाता
हरिवन, पुस ११ । इन्दु शंकर चिनी उद्योग हरिवनको व्यवस्थापन र मजदुरहरुबीचको वार्ता मिलेको छ । उखु किसान प्रतिनिधिसँग तत्काल उद्योग सञ्चालनका लागि उद्योगीहरुको कुरा मिलेपनि मजदुरहरुको आन्दोलनका कारण उद्योग सञ्चालनमा भएको व्यवधान यो सहमतिसँगै सल्टेको छ ।
विहिबार अपरान्ह वीरगंजमा सम्पन्न उद्योग व्यवस्थापन र कामदार मजदुरहरुबीचको वार्ताले तलब भत्तामा वृद्धि गर्ने सहमति गरेको हो । नयाँ सहमति अनुसार तलबमा गाभिने गरी ग्रेडमा ९० रुपैया, तथा औषधी भत्तामा १ सय ५०, शिक्षा भत्तामा १ सय २५, खाजा भत्तामा १ सय २०, पोशाक भत्तामा ६ सय र स्थानीय कामदार कर्मचारी भत्तामा ३ सय रुपैंया वृद्धि भएको छ ।
हरेक दुईवर्षमा तलब भत्तामा वृद्धि हुनुपर्ने श्रम ऐनको व्यवस्था अनुसार आफूहरुले तलब भत्ता वृद्धिको माग राखेको संयुक्त कामदार कर्मचारी युनियनका अध्यक्ष सुरज खनालले बताए । विगत ४ दिनदेखि उद्योगका सञ्चालक राजेश केडिया एवं महाप्रबन्धक विजयकान्त झा र १२ जना मजदुर प्रतिनिधिबीच वीरगंजमा वार्ता भईरहेको थियो । ‘‘वार्तामा सहमति भएको छ ।’’ खनालले भने–‘‘अब हामी काममा फर्कन्छौं ।’’
उद्योगका महाप्रबन्धक विजयकान्त झाले मजदुरहरुसँग सहमति भएको उल्लेख गर्दै दुईचार दिनभित्रै उद्योग सञ्चालन गरिने बताए । ‘‘अब उखु किसानलाई चलानपूर्जी वितरणको प्रकृया सुरु गर्छौ ।’’ उनले भने–‘‘२–४ दिनभित्रै उद्योग सञ्चालन हुन्छ ।’’
उखु किसान प्रतिनिधिहरुसँग चिनी उद्योगीहरुको गत मंगलबार नै तत्काल उद्योग सञ्चालनका लागि सहमति भईसकेको छ । चिनी उद्योगी र किसान प्रतिनिधिबीच नेटपूर्जीमा शुन्य मूल्य लेखेर तत्काल उद्योग सञ्चालन गर्ने र माघ मसान्त भित्र अर्को वार्ता गरी मूल्य तय गर्ने सहमति भएको थियो ।