प्रहरीले अपहरण मुक्त गरायो

प्रहरीले अपहरण मुक्त गरायो
सर्लाही समाचारदाता
मलंगवा, पुस ८ । अज्ञात समूहको अपहरणमा परेका एक इट्टा व्यवसायी सोमबार साँझ प्रहरीको प्रयासमा मुक्त भएका छन् ।
साँझ ७ बजेतिर सखुवा–भेल्ही क्षेत्रबाट अपहरणमा परेका भनिएका इट्टा व्यवसायी श्याम साहलाई प्रहरीको टोलीले मुक्त गराएको हो । चन्द्रनगर गाविस नाडिमन स्थित आÇनो इट्टा भट्टाबाट घरतर्फ जाँदै गर्दा उनी अपहरणमा परेको बताईएको छ । एउटै मोटरसाईकलमा दुईजना जाँदै गर्दा पछाडी बस्नेलाई भगाएर साहलाई अपहरण गरेको बताईएको छ ।
पछाडी बस्ने व्यक्तिले स्थानीय बासिन्दा सहित प्रहरीमा खबर गरेपछि तत्काल प्रहरी सहितको टोलीबाट चारैतर्फ खोजीकार्य तिब्र भएकाले साह मुक्त भएको बताईएको छ । उनलाई सखुवा–भेल्ही क्षेत्रको उखुबारीबाट उद्धार गरिएको प्रहरी स्रोतले बतायो ।
प्रहरी नायव उपरीक्षक सन्तोष भट्टराईले उद्धार गरिएका साहको सदरमुकाम मलंगवा स्थित जिल्ला अस्पतालमा उपचार भईरहेको बताए । ‘‘भेल्ही क्षेत्रबाट उद्धार गरिएको हो ।’’ सोमबार राती साँढे ९ बजे प्रनाउ भट्टराईले सर्लाही दैनिकसँग भने–‘‘उनी अहिले अस्पतालमा बेहोस अवस्थामा छन्, त्यसैले विस्तृतमा केही थाहा पाउन सकिएको छैन ।’’ अपहरणमा परेका व्यक्तको नाम, थर र ठेगाना पनि विस्तृतमा नआईसकेको प्रनाउ भट्टराईले बताए ।
राती साँढे ७ बजे जिल्ला प्रहरी कार्यालय सहित स्थानीय प्रहरी युनिटमा अपहरणको खबर पुगेको थियो । ‘‘अपहरणको खबर आउने वितिकै भक्तिपुर, चन्द्रनगर, त्रिभुवननगर, जिल्ला सबै ठाउँबाट प्रहरीहरु एकसाथ खटिएका थिए ।’’ प्रहरी स्रोतले भन्यो–‘‘सबैतिरबाट प्रहरी परिचालन भएपछि अपहरण गर्ने समूहले कतै लान सकेनन् र उखुबारीमै लुकाएर राखेका रहेछन्, त्यहीबाट उनी अपहरण मुक्त भए ।’’ अपहरणमा परेका साह ब्रम्हपुरी निवासी भएको बताईएको छ ।