इन्दुशंकरले उखु पेल्न थाल्यो

इन्दुशंकरले उखु पेल्न थाल्यो
सर्लाही समाचारदाता
हरिवन, पुस १५ । इन्दु शंकर चिनी उद्योगले सोमबार अपरान्हबाट चालु सिजनको लागि उखु क्रसिङ सुरु गरेको छ ।
पौने ४ बजेबाट उखु क्रसिङ सुरु भएको महाप्रबन्धक विजयकान्त झाले बताए । ‘‘साँझ पौने ४ बजेबाट उखु क्रसिङ सुरु भयो ।’’ महाप्रबन्धक झाले सोमबार सर्लाही दैनिकसँग भने–‘‘विहान ६ बजेबाट चलाउने भनिएपछि प्राविधिक कठिनाईका कारणले साँझबाट मात्र सञ्चालनमा आयो ।’’
साँझबाट सञ्चालनमा आएको उद्योग पूनः रातीबाट प्राविधिक गड्बडीका कारण अवरुद्ध बनेको छ । ‘‘केहीबेर चलेपछि प्राविधिक गड्बडीका कारण उद्योग पूनः बन्द भएको छ ।’’ महाप्रबन्ध झाले भने ।
गतवर्षहरुमा दैनिक ३० हजार क्वीन्टल क्रसिङ गर्दै आएको उद्योगले यसवर्ष ५० हजार क्वीन्टल पु¥याएको छ । ‘‘उद्योगलाई दैनिक ५० हजार क्वीन्टल उखु क्रसिङ गर्ने क्षमतामा पु¥याएका छौं ।’’ महाप्रबन्धक झाले भने–‘‘कम्तिमा दैनिक ४० देखि ४५ हजार क्वीन्टल उखु क्रसिङ हुन्छ ।’’ यसअघिका सिजनहरुमा एउटामात्र डोंगा चल्दै आएकामा यसवर्ष भने उद्योगले दुईवटा डोंगा सञ्चालनमा ल्याउने भएको छ ।
यसवर्ष ४० लाख क्वीन्टल भन्दा बढी उखु क्रसिङ गर्ने लक्ष्य राखिएको समेत महाप्रबन्धक झाले बताए । गतवर्ष पुस ३ गतेबाट सञ्चालनमा आएको इन्दु शंकरले २६ लाख ५० हजार क्वीन्टल उखु क्रसिङ गरेको थियो ।