चिसो बढ्यो

चिसो बढ्यो
सर्लाही समाचारदाता
मलंगवा, पुस १० । केही दिनदेखि चलेको चिसो हावाका कारण सर्लाही सहित तराईको जनजिवन प्रभावित बनेको छ ।
पारिलो घाम लाग्न छाडेपछि र चिसो हावा चलेका कारण केही दिनयता चिसो बढेको छ । बिहानैदेखि प्रायः दिनभर मौसम प्रतिकूल भएपछि सार्वजनिक स्थानहरुमा सर्वसाधारणको चहलपहल घटेको छ । अत्याधिक भिडभाड हुने जनसरोकारका सरकारी कार्यालयहरूमा बढ्दो चिसोका कारण सेवाग्राहीहरूको उपस्थिति पातलिँदै गएको छ । सर्वसाधारणहरु घरआगन एवं चोक चौराहामा आगो (घुर) तापेर बस्न थालेका छन् ।
चिसो बढेसँगै आलु, गोलभेँडा लगायत तरकारी खेती बढी प्रभावित हुन थालेको कृषकहरुले बताएका छन् । शितलहर एवं तुषारोका कारण कम फल्ने र लागेका फलहरुमा समेत अनेकखाले प्रकोप देखिने गरेको किसानहरुको गुनासो छ ।
जाडोमा खास गरी बालबालिका र वृद्धवृद्धा बढी प्रभावित हुने गर्दछन् भने आर्थिक विपन्नता हुने कतिपय सर्वसाधारणहरु ओड्ने ओछ्याउने अनि लगाउने न्यानो कपडाको अभावमा कठ्याङ्ग्रिएर मर्ने गर्दछन् । चिसो बढेसँगै बजारमा जाडोमा प्रयोग हुने न्याना कपडाको व्यापार बढेको छ । स्वास्थ्य केन्द्रहरुमा रुघामर्की, खोकी, निमोनिया लगायतका विरामीहरुको चाप बढ्न थालेको छ ।