जनज्योती शिक्षालयका विद्यार्थीको चेतावनी

जनज्योती शिक्षालयका विद्यार्थीको चेतावनी
सर्लाही समाचारदाता
लालबन्दी, पुस ११ । जनज्योती प्राविधिक शिक्षालय लालबन्दीले शैक्षिक भ्रमणका लागि उचित सहयोग नदिएको भन्दै उक्त शिक्षालयका विद्यार्थीहरुले गुनासो गरेका छन् ।
पाँच दिने शैक्षिक भ्रमणका लागि आग्रह गर्दा पनि शिक्षालयले कुनै सुनवाई नगरेको विद्यार्थीहरुले गुनासो गरेका छन् । तीनवर्षे डिप्लोमा इन कम्प्युटर इन्जिनियरिङ्गमा अध्ययनरत विद्यार्थीहरुले पाँच दिने शैक्षिक भ्रमणका लागि शिक्षालयले कुनै चासो नदिएको गुनासो गरेका हुन् ।
विद्यार्थी संघर्ष समितिको तर्फबाट संयोजक विश्वमणि थापा, सहसंयोजक अञ्जना शिवाकोटी, सचिव कृष्ण सापकोटा र सदस्यहरु रुपेश क्षेत्री, आसनारायण चौधरी लगायतको हस्ताक्षर रहेको एक विज्ञप्ति प्रकाशित गरी विद्यार्थीहरुले शिक्षालयसमक्ष शैक्षिक भ्रमणका लागि उचित सहयोग गर्न समेत जनज्योती आग्रह गरेका छन् । विज्ञप्तिमा विद्यार्थीउपर धम्कीपूर्ण व्यवहार गर्ते प्रवृत्तिबाट अत्यन्त चिन्तित भएको उल्लेख गर्दै त्यसबाट विद्यार्थीहरुको अधिकार कुण्ठित भएको महसुस गरिएको समेत उल्लेख छ ।
समस्या समाधानका लागि उचित अन्तरक्रियात्मक छलफल र बहुपक्षीय वार्ताबाट समाधानको पहल नभए कडा आन्दोलन गर्ने विद्यार्थी नेताहरुको विज्ञप्तिमा उल्लेख छ ।