हाम्रा सय दिन

प्रकाशकीय

हाम्रा सय दिन

यो अंकसँगै तपाईहरुमाँझ हामीले दैनिक भेट्न थालेको १०० दिन पुगेको छ अर्थात यस सर्लाही दैनिकको सयौं अंक तपाईहरुको हातमा छ । दैनिक भेट्ने गरि तपाईहरुमाँझ हामी २०७० भदौ १८ गतेबाट प्रस्तुत भएका थियौं । यसक्रममा हामीलाई धेरै सुखद तथा दुःखद क्षणहरु सँगसँगै आइरहेका छन्् तथापी हामी ‘सुुखमा नमातिनु र दुःखमा नआतिनु’ भन्ने पुरानो भनाई जस्तै निर्भिकताका साथ निरन्तर बढिरहने छौं । जसका लागि आम पाठक, विज्ञापनदाता र शुभेच्छुकहरुको उतिकै सहयोग, सद्भाव र उचित मार्गदर्शनको हामीले अपेक्षा गरेका छौं । पाठक, विज्ञापनदाता र शुभेच्छुकहरुबाट पाउने माया नै हाम्रो अग्रगामी पाइलाका लागि प्रमुख आधार हो । सर्लाहीमा लामो इतिहाँस नभएपनि गुणस्तरीय र व्यवसायिक पत्रकारिताका लागि हामी प्रयासरत रहने प्रण गर्दछौं ।
व्यवसायिक रुपमा दैनिक पत्रिका चलाउनु आफैमा एउटा चुनौतीपूर्ण काम हो । तुलनात्मक रुपमा सर्लाही जस्तो आर्थिक संभावनाका स्रोतहरु कमजोर भएको र संचारको महत्वबारे पर्याप्त जागरण नभएको जिल्लामा नियमित रुपले व्यवसायिक ढंगबाट पत्रिका चलाउनुलाई फलामको चिउरा चपाउनु सरह मान्न सकिन्छ । त्यसमा पनि कुनै ‘निहित उद्धेश्य’ परिपूर्ति एवं ‘पूर्वाग्रहीयुक्त’ समाचारहरु प्रकाशित गर्नका लागि मात्र पनि पत्रिका चलाउने र ‘दुई दिनको घामछाँया’ भने जस्तै नयाँ वर्ष, दशै तिहार जस्ता महत्वपूर्ण चाडबाडहरुमा शुभकामना विज्ञापन छाप्नका लागि मात्र बजारमा आउने प्रचलनले हाम्रो जस्तो नियमित रुपमा व्यवसायिक ढंगले प्रकाशित हुने पत्रिकालाई अझ बढी चुनौती देखिएको छ ।
राज्यले पनि संचार जगतलाई समान दृष्टिले हेर्न नसकेको र विज्ञापन वितरण सम्बन्धि औपचारिक नीति नभएकोले नियमित रुपले प्रकाशित हुने पत्रपत्रिकाहरु बारम्बार संकटग्रस्त भईरहेका छन् । नियमितता भन्दा पनि आक्कल झुक्कल प्रकाशित हुने पत्र पत्रिकाहरुमा कर्मचारीहरुको ‘निकटता’ वा ‘नीहित स्वार्थ’ का कारण सरकारी तथा गैरसरकारी क्षेत्रका विज्ञापनहरु प्रकाशित भईरहेको छ । कतिपय सरकारी तथा गैर सरकारी कार्यालयहरुले आफू सम्बद्ध समाचारहरु प्रकाशनका लागि अनेकखाले हत्कण्डा अपनाउने र विज्ञापन वा सूचना चाँही भित्ता वा सूचना पाटीमा टाँस गर्ने प्रचलन अंगीकार गर्दा व्यवसायिक पत्रकारितामा टेवा नपुग्ने समेत आग्रह गर्न चाहन्छौं  ।
आर्थिक संकटसँगै समाचारको विषयमा दवाव सृजना गर्ने व्यक्ति वा समुह र अपराधीहरुबाट समेत प्रताडित हुनबाट संचारक्षेत्र अछुतो रहेको छैन । पछिल्लो समय जिल्लामा पार्टी पत्रकारिताको रुपमा मुखपत्र जस्तै बनेर केही पत्र पत्रिकाहरु प्रकाशित भएको भन्दै व्यापक जनगुनासो समेत बढिरहेको छ । जुन व्यवसायिक पत्रकारिताको मूल्य र मान्यता तथा आमजनताले खोजे र सोचे जस्तो निश्पक्ष पत्रकारिता विपरित हो भन्ने हाम्रो ठहर छ । ‘सत्य, तथ्य र निश्पक्ष पत्रकारिताः हाम्रो प्रतिबद्धता’ भन्ने मूल नाराका साथ हामी अगाडी बढ्ने छौं ।
साथै हाम्रो दैनिक प्रकाशित हुने पत्रिका सर्लाहीका विभिन्न पत्रपत्रिका पसलहरुमा एवं पत्रिका वितरक (हकर) को माध्यमले पाठकहरुको हातहातमा पु¥याउनका लागि हामी मरिमेटेर लागि परेका छौं । पत्रिका वितरण गर्ने हकरको कमजोरीका कारण कतिपय अंकहरु तपाईहरुको हातहातमा नपुगेको हुन सक्छ, त्यसका लागि क्षमाप्रार्थी छौं र यसको सुधारमा निरन्तर लागिरहेका छौं ।
आम नागरिक र संचार जगतले एक अर्कालाई बुझ्न र फराकिलो सोच विकसित गर्न जरुरी छ । राज्य लोकतान्त्रिक गणतन्त्र र समावेशी हुँदै संघीय संरचनाको समेत संघारमा उभिईरहेको वर्तमान अवस्थामा संचार जगतले पनि आफुलाई त्यस अवधारणा बमोजिम स्पष्ट गर्नै पर्छ । नयाँ नेपाल निर्माणको अभियानमा सबैका भावनाको सम्मान र सकारात्मक दिशामा परिस्थितीलाई लैजान संचार माध्यमले आफुलाई बदल्न सक्नुपर्छ । त्यस्तै आन्दोलनरत पक्ष, नागरिक समाज, राजनैतिक दल र विभिन्न समुहहरुले प्रेस स्वतन्त्रताको महत्व, सिमा र मापदण्डहरु बारे स्पष्ट हुनु जरुरी छ । प्रेस स्वतन्त्रता विना लोकतन्त्रको कल्पना पनि गर्न सकिदैन भन्ने तथ्य प्रति सबैले हृदयंगम गर्दा अझ बढी यस क्षेत्रको उन्नती प्रगति हुने कुरामा दुईमत छैन ।
खासगरी स्वतन्त्र र निर्भिक पत्रकारितासँगै त्यसको आचारसंहिता पालनामा पनि संचारजगत गम्भिर हुनुपर्छ । संघीय गणतन्त्रात्मक शासन, लोकतान्त्रिक पद्धती र परिवर्तनप्रति संचारजगतको प्रतिबद्धता नै जनविश्वासको मुख्य आधार हो । त्यसक्रममा आम पाठक एवं शुभेच्छुकबाट पाउने प्रतिक्रिया, सरसल्लाह र सुझावले सञ्चार माध्यमलाई महत्वपूर्ण प्रेरणा प्राप्त हुन्छ । हामी निरन्तर पाठक, शुभेच्छुक एवं विज्ञापनदाताहरुको सेवामा प्रतिवद्ध रहने प्रण पूनः गर्दछौं र आवश्यक सल्लाह एवं सुझावको अपेक्षा समेत हामीले राखेका छौं ।
हाम्रो अर्को मुख्य लक्ष्य भनेको सर्लाहीलाई नै मुख्य कर्मथलो मानेर समाचार प्रकाशन गर्ने र जिल्लाबासीकै पीडामा मलमपट्टी लगाउन हरदम प्रयासरत रहने छौं । स्थानीय समाचारलाई बढी प्राथमिकताका साथ प्रकाशन गर्नेतर्फ हाम्रो दृढ विश्वास रहेको छ । स्थानीय कला, संस्कृतिको जगेर्ना गर्ने मात्र हैन अनियमितता उजागर गर्ने र ‘आवाज विहिनहरुको आवाज’ बन्नका लागि हामी मरिमेट्ने छौं । सर्लाहीकै विषयबस्तुलाई मुख्य समाचार बनाउने र भरसक स्थानीय समाचारलाई नै बढी प्राथमिकता दिने कुरामा हामी रतिभर कञ्जुस्याँई गर्ने छैनौं  र यस दैनिकको सयौं अंकसम्म आईपुग्दा स्थानीय समाचारलाई नै मुख्य समाचारको रुपमा प्राथमिकताका साथ प्रकाशित गरिरहेका छौं । जसले गर्दा हामीलाई चौतर्फी रुपमा हौसला एवं प्रोत्साहन मिलिरहेको छ, जुन अमूल्य सम्पतिको रुपमा लिदै हामी निरन्तर अगाडी बढ्ने छौं । बढीभन्दा बढी स्थानीय समाचारहरु नै प्रकाशित गर्नका लागि आम पाठक, सरोकारवाला निकाय अनि दुरदराजका गाउँबस्तीका अगूवाहरुले हामीलाई समयमै सूचना अनि खबर गरिदिएर आÇनो आवाज बुलन्द पार्ने मात्र हैन यस दैनिक पत्रिकाको अभियानमा सहयोग पु¥याउनु हुनेछ भन्ने अपेक्षा गरेका छौं ।
– टंकबहादुर क्षेत्री
प्रकाशक