लालबन्दी फिडरलाई विद्युतको नमूना बनाईने

लालबन्दी फिडरलाई विद्युतको नमूना बनाईने
सर्लाही समाचारदाता
लालबन्दी, पुस १२ । नेपाल विद्युत प्राधिकरण मलंगवा वितरण केन्द्रले शुक्रबार लालबन्दीमा अन्तरक्रिया कार्यक्रम आयोजना गरेको छ ।
विद्युत प्राधिकरणको हरिपुर सबस्टेशन अन्तर्गत लालबन्दी फिडरलाई नमूना फिडर बनाउने सम्बन्धमा अन्तरक्रिया कार्यक्रम भएको हो । कार्यक्रममा प्राधिकरण क्षेत्रीय कार्यालय जनकपुरका प्रमुख विभुतीनाथ मिश्र, सहायक प्रमुख राजिव सिंह, प्राधिकरण सर्लाहीका प्रमुख दिपेन्द्रराज द्विवेदी लगायतका अधिकारीहरुको उपस्थिती रहेको थियो ।
लालबन्दी स्थित जानकी निमाविमा भएको कार्यक्रममा बोल्दै स्थानीय उद्योग वाणिज्य संघका अध्यक्ष बाबुकाजी प्रधानले प्राधिकरणले उपभोक्तालाई हित हुने गरी अगाडी बढ्नुपर्ने बताए । राष्ट्रिय लोडसेडिङको तुलनामा अतिरिक्त लोडसेडिङको भार थमाएर सर्लाहीका उपभोक्तालाई विद्युत प्राधिकरणले अन्याय गरिरहेको प्रधानले गुनासो गरे । ‘‘एक–दुई घण्टा हैन, लोडसेडिङ बाहेक पनि पाँच–छ घण्टासम्म निरन्तर विद्युत आउँदैन ।’’ उनले भने–‘‘चोरी गर्नेहरुमाथि कडा कार्वाही गर्नुपर्छ, त्यसका लागि जे सुकै सहयोग गर्न हामी तयार छौं ।’’ प्राधिकरणले चुहावटको नाममा आम जिल्लाबासीलाई होलसेलमा दण्डित गरिरहेको प्रति समेत उनले आपत्ती जनाए ।
कार्यक्रममा बोल्दै स्थानीय शुशिल थपलियाले गाउँ–गाउँमा विद्युत चुहावटका लागि अभियान चलाउनुपर्ने माग गरे । ‘‘प्राधिकरणले चुहावट नियन्त्रणका लागि गाउँ–गाउँमा अभियान चलाओस् ।’’ उनले भने–‘‘जस्तोसुकै सहयोग गर्नपनि हामी तयार छौं, केही व्यक्तिले विद्युत चोरी गरेको बहानामा सबै उपभोक्तालाई एउटै तराजुमा राखेर हेर्ने काम नहोस्, जसले चोरी गरेको छ उसैलाई कार्वाही होस् ।’’
प्राधिकरण क्षेत्रीय कार्यालय जनकपुरका प्रमुख मिश्रले सुधारका लागि प्रयास भईरहेको र त्यसमा सबै पक्ष, तह र तप्काको सहयोग जरुरी रहेको बताए । प्राधिकरण सर्लाहीका प्रमुख द्विवेदीले ढल्केबर सबस्टेशनको ट्रान्सफर्मर जलेकाले तत्कालिन समस्या देखिएको बताउँदै उक्त ट्रान्सफर्मर बनेपछि केहीहदसम्म अतिरिक्त लोडसेडिङको समस्या नदेखिने बताए । ‘‘ढल्केबरको ट्रान्सफर्मर विग्रेका कारण चुहावट बाहेकको थप लोडसेडिङ हुँदै आएको छ ।’’ उनले भने–‘‘ढल्केबरको बनेपछि र बरहथवामा पनि बन्दै गरेको सबस्टेशन चालु भएपछि धेरै हदसम्म अतिरिक्त लोडसेडिङको मार घट्ने छ ।’’
प्राधिकरण सर्लाहीका प्रमुख द्विवेदीले गाउँगाउँमा चुहावट नियन्त्रण अभियान सञ्चालन गरेर विद्युत चोरी विरुद्ध कार्वाही चलाईने प्रतिबद्धता समेत जनाए । ‘‘हामीले कार्ययोजना बनाएरै माथिल्लो निकायमा पेश गरिसकेका छौं ।’’ उनले भने–‘‘सबै पक्ष, तह र तप्काको सहयोगमा चुहावट नियन्त्रण अभियान चलाउँछौं र सँगसँगै विद्युत पोल, तार लगायत सामग्रीहरुको मर्मत संभारको काम पनि सुरु गर्नेछौं ।’’ सिमित स्रोत र साधन एवं जनशक्ति हुँदा समेत विद्युत चोरी नियन्त्रण्मा प्रभावकारी कदम चाल्न कठिनाई भईरहेको प्राधिकरण सर्लाहीका प्रमुख द्विवेदीले बताए ।
द्विवेदीले लालबन्दी फिडरमा हाल ३९.६ प्रतिशत मात्र चुहावट रहेकाले अतिरिक्त १ घण्टाभन्दा बढी लोडसेडिङ नगर्न माथिल्लो निकायमा पत्र समेत पठाईसकेको बताए । ३५ प्रतिशतभन्दा बढी र ४० प्रतिशतभन्दा कम चुहावट भएमा १ घण्टामात्र अतिरिक्त लोडसेडिङ गर्ने विद्युत प्राधिकरणले नियम राखेको छ ।