विवादित गाविसमा धमाधम गाउँ परिषद हुँदै

सर्लाही समाचारदाता
मोहनपुर, चैत १४ । तोकिएको समय भित्र परिषद हुन नसकेका जिल्ला स्थित विभिन्न गाविसहरुको धमाधम गाउँ परिषद हुन थालेको छ । संघीय मामिला तथा स्थानीय विकास मन्त्रालयले तोकेको  नियमानुसार पुस मसान्त भित्र गाविसहरुको तथा फागुन मसान्त भित्र जिल्ला विकास समितिको परिषद सम्पन्न भईसक्नुपर्ने हुन्छ । तर जिल्ला स्थित ९९ वटा गाविस मध्ये जिल्ला विकास समितिको कार्यालयको तथ्यांक अनुसार सातवटा गाविसको गाउँ परिषद पुस मसान्त भित्र हुन सकेको थिएन । जसमध्ये शुक्रबारसम्म दुईवटा गाविसमा गाउँ परिषद भएका छन् । दुईदर्जन भन्दा बढी गाविसहरुको पुस मसान्त भित्र परिषद हुन नसकेको भएपनि कतिपय गाविसहरुको ‘व्याक डेट’ मा परिषद सम्पन्न गरि कागजात मिलाइएको जानकारहरु बताउँछन् ।
शुक्रबार मोहनपुर गाविसको र बुधबार रामवन गाविसको गाउँ परिषद सम्पन्न भएको हो । शुक्रबार गाविस सचिव गोपाल सिंह आलेको सभापतित्व एवं जिल्ला विकास समितिको कार्यालयका योजना अधिकृत होमबहादुर थापाको प्रमुख आतिथ्यतामा मोहनपुर गाविसको परिषद सम्पन्न भएको छ । कार्यक्रममा गाविस सचिव हक हित संरक्षण केन्द्रका अध्यक्ष हरिकान्तलाल कर्ण लगायत स्थानीय राजनैतिक दलका प्रतिनिधिहरुको उपस्थिती रहेको थियो ।
गाविस भवन बनाउने विषयमा विवाद हुँदा तोकिएको समयमा परिषद हुन नसकेको र शुक्रबार अधिकाशं राजनैतिक दलहरुबीच सहमति गराएर गाउँ परिषद सम्पन्न गरिएको योजना अधिकृत थापाले बताए । थापाका अनुसार यसअघि मोहनपुरमा गाविस भवन निर्माण सुरु गरिएको भएपनि केही राजनैतिक दलका नेताहरुले पोखरीयामा गाविस भवन बनाउनु पर्ने भन्दै विवाद झिकेपछि मोहनपुर गाविसको परिषद तोकिएको समयमा हुन नसकेको हो ।
निर्माण सुरु भईसकेकै स्थानमा भवनको काम थाल्ने लगायत विविध विषयहरुमा सहमति गर्दै उक्त गाविसको शुक्रबार परिषद सम्पन्न भएको हो । नेकपा एमाले र सद्भावना पार्टी बाहेक अन्य नौवटा राजनैतिक दलका प्रतिनिधिले मोहनपुरमै गाविस भवन निर्माण गर्ने सहमति गरेको थापाले बताए ।
थापाका अनुसार परिषदले आर्थिक वर्ष ०७१÷०७२ का लागि अनुमानित बजेट पारित समेत गरेको छ । त्यस्तै रामवन गाविसको पनि गत बुधबार परिषद सम्पन्न भएको स्थानीय विकास अधिकारी उमेश बस्नेतले बताए । बस्नेतका अनुसार बगदह र बहादुरपुरको आगामी सोमबार        (चैत १७ गते) तथा सुदामा गाविसको आगामी बुधबार (चैत १९ गते) गाउँ परिषदका लागि समय तोकिएको छ । स्थानीय राजनैतिक दलका नेता, नागरिक समाजका प्रतिनिधि सहित सरोकारवालाहरुको स्थानीय गाविस परिसरमै छलफल राखेर परिषद्को मिति तोकिएको स्थानीय विकास अधिकारी बस्नेतले बताए । विवादति गाविसहरुमा सहमतिको प्रयास गर्दै परिषद सम्पन्न गर्न र यावत विषयमा गाविस कार्यालयहरुको स्थलगत अनुगमन गर्न आफू क्षेत्र नं. ६ तथा जिविसका अन्य अधिकृतहरुलाई क्षेत्र–क्षेत्रमा खटाइएको समेत बस्नेतले बताए । गाविसहरुले आर्थिक वर्ष ०७०÷०७१ को परिषद् पुस मसान्त भित्र सक्नुपर्ने भएपनि सर्लाहीका सातवटा गाविसले भने गरेका थिएनन् । मोहनपुर, बहादुरपुर, सलेमपुर, मोतिपुर, सुदामा, बगदह र रामवन गाविसको पुस मसान्त भित्र परिषद् हुन नसकेको जिविस कार्यालयले जनाएको छ । राजनैतिक दलहरुबीचको हानाथाप एवं होडबाजीका कारण यी गाविसहरुमा तोकिएको समयभित्र परिषद हुन नसकेको जिविसले जनाएको छ । सलेमपुर र मोतिपुरमा पनि निकट भविष्यमै गाउँ परिषद् सम्पन्न गर्नका लागि जिविसबाट प्रयासहरु भईरहेको स्थानीय विकास अधिकारी बस्नेतले बताए । पुस मसान्तभित्र दुई दर्जनभन्दा बढी गाविसहरुको परिषद् सम्पन्न नभएपनि कतिपय गाविसहरुको भने ‘व्याक डेट’ मा परिषद गरेको कागजात मिलाइएको स्रोतले दावी गरेको छ ।
पुस मसान्त भित्र परिषद नहुने गाविसहरुको न्यूनतम शर्त मापनमा अंक घट्ने र थप अनुदान लगायत कटौती हुने जानकारहरु बताउँछन् । अधिकांश गाविसमा राजनैतिक हानाथाप एवं तानातानका कारण तथा केहीमा स्वयं गाविस सचिवको कमजोरीका कारण सर्लाहीमा तोकिएको समय भित्र गाविसहरुको गाउँ परिषद् हुन नसक्ने विकृति वर्षौदेखि कायम छ ।