मुल्यमा आ–आफ्नै अडान

मुल्यमा आ–आफ्नै अडान
सर्लाही समाचारदाता
हरिवन, चैत ११ । उखु मुल्य तय गर्ने विषयमा गठित त्रिपक्षीय कार्यदलको मंगलबार काठमाडौंमा बसेको बैठकले पनि कुनै टुंगो लगाउन सकेन ।
उद्योग मन्त्रालयमा अपरान्ह बसेको बैठकमा चिनी उद्योगपतिहरुले गतवर्षको जति मूल्य दिन नसकिने अडान राखेकाले कुनै टुंगो लाग्न नसकेको नेपाल उखु उत्पादक महासंघका अध्यक्ष कपिलमुनी मैनालीले बताए । ‘‘सरकारका विभिन्न मन्त्रालयका सहसचिवहरुसँग हामी किसानहरु र उद्योगपतिहरुले छुट्टाछुट्टै तथा संयुक्त रुपमा मुल्यका विषयमा छलफल ग¥यौं ।’’ अध्यक्ष मैनालीले मंगलबार साँझ सर्लाही दैनिकसँग टेलिफोनमा भने–‘‘तर कुनै टुंगो लाग्न सकेन र अर्को बैठक कहिल्य बस्ने भन्ने पनि तय हुन सकेन ।’’
उद्योगपतिहरुले प्रति क्वीन्टल भ्याट सहित चारसय ६० रुपैयाभन्दा बढी दिन नसक्ने तथा आफूहरुले कम्तिमा गतवर्षको जति अर्थात चारसय ८१ रुपैया मुल्य हुनुपर्ने अडान राखेपछि बैठक विना निश्कर्ष टुंगिएको मैनालीले बताए । बैठकमा उद्योग मन्त्रालय, अर्थ मन्त्रालय, कृषि मन्त्रालय, आपूर्ति मन्त्रालय लगायतका सहसचिवहरु तथा उद्योगपतिहरु शशिकान्त अग्रवाल, राजेश केडिया र राजकुमार अग्रवाल एवं किसान नेताहरुको सहभागिता रहेको थियो ।
किसान नेता र उद्योगपतिहरुबीच चौथो चरणको वार्तामा समेत मुल्यका विषयमा कुनै सहमति हुन नसकेपछि सरकारलाई मध्यस्थताका लागि आग्रह गरेका थिए । दुवैपक्षबाट आएको आग्रह पश्चात बसेको त्रिपक्षीय बैठकले मुल्य तय गर्न कार्यदल गठन गरेको थियो । आगामी चैत १५ गते शनिबार भित्र मुल्यका विषयमा टुंगो लगाउने वा आवश्यक प्रतिवेदन सरकारलाई बुझाउने सहमतिका साथ केही समयअघि त्रिपक्षीय कार्यदल गठन भएको थियो ।
कार्यदलको यसअघि चैत ७ गते पनि बैठक बसेको र आगामी बैठक बस्ने बारेमा कुनै सहमति हुन नसकेको मैनालीले बताए ।  ‘‘उद्योग मन्त्रालयका सहसचिवज्यूले सचिव र मन्त्रीज्यूसँग छलफल गरेर आगामी बैठकको बारेमा जानकारी गराउने भन्नु भएको छ ।’’ मैनालीले भने । सुन्य मूल्य लेखिएको नेटपूर्जीका आधारमा उद्योगलाई उखु दिईरहेको किसानहरुले हाल प्रति क्वीन्टल चारसय रुपैयाका दरले पेश्कि रकम लिइरहेका छन् ।