ईश्वरपुर र जब्दीमा सरसफाई सम्मेलन

ईश्वरपुर र जब्दीमा सरसफाई सम्मेलन
सर्लाही समाचारदाता
ईश्वरपुर, चैत ११ । गाविस क्षेत्रलाई खुला दिसामुक्त बनाउनका लागि नगरोन्मुख गाविसको कार्यालय ईश्वरपुरले मंगलबार १६ बुँदे घोषणापत्र जारी गरेको छ ।
२०७१ चैत मसान्त भित्र गाविसका विभिन्न सरकारी कार्यालयका कर्मचारी, राजनीतिक दलका प्रतिनिधी, शिक्षक लगायतले आ–आÇनो घरमा सौचालय निर्मार्ण गरिसक्नु पर्ने लगायत १६ बुँदे घोषणापत्र जारी भएको हो । २०७१ साल चैत मसान्त भित्र खुला दिशामुक्त क्षेत्र घोषणा गर्ने गरि काम कार्वाही अगाडी बढाउने गरि घोषणा पत्र जारि गरिएको गाविस सचिव मदन थिङले बताए । थिङका अनुसार घोषणा सफल बनाउन विभिन्न कार्यतालिका समेत बनाइएको छ ।
घोषणापत्रमा उल्लेखित कुराहरु पुरा नगर्नेलाई २०७२ साल जेठ १ गतेबाट गाविसबाट पाउने सेवा सुविधामा रोक लगाइने बताईएको छ । विपन्न परिवारलाई शौचालय निमार्णका लागी गाविसले सहयोग गर्ने समेत घोषणापत्रमा उल्लेख गरिएको छ ।
गाविस सचिव मदन बहादुर थिङ्को अध्यक्षता तथा जिल्ला विकास समितिका योजना अधिकृत होमबहादुर थापाको प्रमुख आतिथ्यतामा सम्मेलन सम्पन्न भएको हो । सम्मेलनमा जिल्ला खानेपानी तथा सरसफाई डिभिजन कार्यालयका ईन्जिनियर शिवशंकर रौनियार, नेपाली काँग्रेस गाउँ सभापति बेचुप्रसाद तिमल्सिना, ईलाका प्रहरी कार्यालय केशरगंजका प्रमुख यज्ञबहादुर भट्राई, लालबन्दी गाविसका सचिव शम्भु ठाकुर, मनकामना बचत तथा ऋण सहकारी संस्थाकी अध्यक्ष पद्मकुमारी खरेल लगायत अतिथी रहेका थिए ।
त्यस्तै जब्दी गाविसमा पनि मंगलबार गाविस स्तरिय सरसफाई सम्मेलन सम्पन्न भएको छ । गाविसको वडा नम्वर ६ हरिभवनमा भएको सम्मेलनले प्रमिला न्यौपानेको संयोजकत्वमा १५ सदस्यीय वडा सुधार समिति गठन गरेको छ । गाविस सचिव सोम प्रसाद न्यौपानेको अध्यक्षता तथा नेपाली कांग्रेस गाउँ सभापति कमल चौधरीको उपस्थितिमा सरसफाई सम्मेलन सम्पन्न गरिएको गाविस कार्यालयले जनाएको छ । सरसफाई सम्मेलनमा जिल्लालाई खुल्ला दिशामुक्त जिल्ला घोषणा गर्नु पुर्व सबै स्थानीयले आफुहरुलाई झुल वितरण गर्नुपर्ने माग गरेका छन् । साथै कार्यक्रममा नेपाली कांग्रेस गाउँ सभापति कमल चौधरीले विपन्न परिवारलाई शौचालयको लागि गाविसले ७० प्रतिशत रकम दिन सक्ने बताएका छन् । त्यस्तै चैत अन्तिम सम्ममा सबैले शौचालय बनाउनु पर्ने र नबनाएको खण्डमा गाविस बाट पाउने सबै सेवा सुविधाबाट बन्चित हुने गाविस सचिव न्यौपानेले बताएका छन् । विपन्न परिवारलाई शौचालय निमार्णका लागी सहयोग गर्ने समेत निर्णय भएको छ ।
सर्लाहीलाई २०७२ साल सम्ममा खुल्ला दिशामुक्त जिल्ला घोषणा गर्नका लागी हाल विभिन्न गाविसहरुमा सरसफाई सम्मेलन भैरहेको छ । गत माघ अन्तिम साता भएको जिल्ला सरसफाई सम्मेलनले सर्लाहीलाई वि.सं. २०७२ सालसम्म खुला दिसामुक्त जिल्लाको रुपमा घोषणा गर्ने घोषणापत्र जारी गरेको थियो ।