आगलागीबाट पाँच लाख बराबरको क्षति

सर्लाही समाचारदाता
घुर्कौली, चैत १२ । घुर्कौली गाविस–५ स्थित उखु बारीमा बुधबार आगलागी हुँदा एक बिगाहा क्षेत्रफलमा लगाएको उखु जलेर नष्ट भएको छ ।
स्थानीय ईन्द्रमणि मैनालीको खाली जमिनमा रहेको पत्कर जलाउन बालिएको आगोका कारण अर्का स्थानीय कृष्णप्रसाद उपे्रतीको एक बिहागा क्षेत्रफलमा लगाएको उखु जलेर नष्ट भएको हो । आगलागीबाट करिव पाँच लाख बराबरको उखु जलेर नष्ट भएको ईलाका प्रहरी कार्यालय हरिवनले जनाएको छ । बिहान सबा ११ बजेतिर भएको आगालागी प्रहरी र स्थानियको सहयोगमा करिव एक घण्टापछि नियन्त्रणमा लिईएको थियो । समयमा नै आगो नियन्त्रणमा लिएका कारण थप क्षति हुन नपाएको स्थानीयले बताएका छन् । आगलागीबाट एक बिगाह जमिनमा लगाएको सम्पूर्ण उखु जलेर नष्ट भएपछि उपे्रती परिवार चिन्तित भएको छ ।