८६ परीक्षार्थी र १० निरीक्षक निष्काशित

सर्लाही समाचारदाता
मलंगवा, चैत १४ । एसएलसी    (प्रवेशिका) परीक्षा–२०७० का क्रममा सर्लाहीबाट ८६ जना परिक्षार्थी एवं १० जना निरीक्षक    (गार्ड) कार्वाहीमा परेका छन् । अमर्यादित एवं अनियमित क्रियाक्लाप गरेको आरोपमा उनीहरुलाई परीक्षाको बीचबाटै निष्काशन गरिएको हो ।
गत विहिबार एसएलसीको पहिलो दिन नै विभिन्न परीक्षा केन्द्रबाट ४८ जना परीक्षार्थी निष्काशनमा परेका थिए भने अनिवार्य गणितको दिन सोमबार २३ जना परीक्षार्थी कार्वाहीमा परेका थिए । प्रमुख जिल्ला अधिकारी दिनेश घिमिरे लगायत विभिन्न अनुगमन टोलीले ‘चिट’ चोरिरहेको अवस्थामा परीक्षार्थीलाई तथा चिट चोराईरहेको अवस्थामा निरीक्षकलाई फेला पारेपछि निष्काशन गरेको हो ।
पछिल्लो पटक परीक्षा नियन्त्रण कार्यालय भक्तपुरले जिल्ला शिक्षा कार्यालयमा पठाएको विवरण अनुसार एसएलसी परीक्षामा सर्लाहीबाट नियमिततर्फ ६ हजार आठसय १३ र एक्जाम्टेडतर्फ दुईहजार सातसय १४ गरी नौहजार पाँचसय २७ जना परीक्षार्थी रहेका थिए ।
३३ संस्थागत (निजी) विद्यालय, प्राइभेट १, दुईवटा खुला विद्यालय, गृहिणी मावि सहित जम्मा एकसय १२ वटा शैक्षीक संस्थाका विद्यार्थीहरुको ३१ वटा केन्द्रमा परीक्षा शुक्रबार लिखित परीक्षा सम्पन्न भएको हो । परीक्षा समन्वय समितिका अध्यक्ष समेत रहेका प्रजिअ घिमिरेले एसएलसी परीक्षा तुलनात्मक रुपमा शान्तिपूर्ण एवं मर्यादित रुपमा सम्पन्न भएको बताए । ‘‘परीक्षा शान्तिपूर्ण रुपमै सम्पन्न भयो ।’’ प्रजिअ घिमिरेले भने–‘‘कडाई गर्दा केही विरोधहरु आएपनि मर्यादित परीक्षाका लागि कुनै कसर बाँकी राखिएको थिएन ।’’
जिल्ला स्थित राजनैतिक, शैक्षिक लगायत विविध क्षेत्रका अगुवाहरुले एसएलसी परीक्षाका बारेमा मानसिक रुपमै परिवर्तन हुनुपर्ने खाँचो रहेको समेत प्रजिअ घिमिरेले आग्रह गरे । परीक्षामा कडाइका साथै अध्ययन अध्यापनको स्तर वृद्धिमा समेत ख्याल गरिनुपर्ने आवश्यकता रहेको प्रजिअ घिमिरेले प्रश्ट्याए । ‘‘कतिपय केन्द्राध्यक्षहरुले समेत जिम्मेवारी अनुसार भूमिका निर्वाह नगरेको देखियो ।’’ प्रजिअ घिमिरेले भने–‘‘सबै क्षेत्र, तह र तप्काबाट एसएलसी परीक्षालाई मर्यादित बनाउन सकृयता देखाउनुपर्छ ।’’ जिल्ला शिक्षा अधिकारी राजकुमार विश्वकर्माले अपवादमा बाहेक सर्लाहीमा एसएलसी परीक्षा शान्तिपूर्ण एवं मर्यादित रुपमा सम्पन्न भएको दावी गरे । ‘‘गत विगत वर्षहरुको तुलनामा एसएलसी परीक्षा यसवर्ष थप मर्यादित रुपमा सम्पन्न भएको छ ।’’ जिशिअ विश्वकर्माले भने–‘‘कडाई गरिएको बारे कोही कसैले कडा विरोध पनि गरे, तर परीक्षालाई मर्यादित बनाउने काममा हामी पछि हटेनौं, गलत गरेको भेट्नेलाई कार्वाही नै ग¥यौं ।’’
शनिबार र आइतबार दुई दिनसम्म भने एसएलसी परीक्षा अन्तर्गत प्रयोगात्मक परीक्षा हुँदैछ । विभिन्न १३ वटा विद्यालयहरुमा अंग्रेजी र कम्प्युटर विषयको प्रयोगात्मक हुने जिल्ला शिक्षा कार्यालयका विद्यालय निरीक्षक कविराज उप्रेतीले बताए । उप्रेतीका अनुसार श्रीमति कृष्णादेवी मलंगवा, पब्लिक मावि मलंगवा, सरस्वती मावि भक्तिपुर, जनज्योती उमावि लालबन्दी, नारायण उमावि केशरगंज, महाविर उमावि हरिपुर, चज उमावि सुखेपोखरी, उमावि कर्मैया, उमावि बरहथवा, उमावि सितापुर, उमावि गोडैता, उमावि गढैयामा अंग्रेजी विषयको तथा बौद्यीदेवी मावि मुसैली र जनज्योती उमावि लालबन्दीमा कम्प्युटर विषयको प्रयोगात्मक हुनेछ ।