मलंगवाका अतिक्रमित पसल हटाइयो

मलंगवाका अतिक्रमित पसल हटाइयो
सर्लाही समाचारदाता
मलंगवा, चैत ०९ । मलंगवा नगरपालिका कार्यालयले बसपार्क नजिक साप्ताहिक रुपमा हाट        (बजार) लाग्ने जनसागर बजार क्षेत्रमा सार्वजनिक जग्गा अतिक्रमण गरि टहरामा राखिएका पसलहरु हटाएको छ ।
जनसागर बजारमा वर्षौ देखि अतिक्रमण गरेर निर्माण गरिएका व्यापारिक टहराका पसलहरु हटाइएको मलंगवा नगरपालिका प्रमुख रामचरित्र मेहताले बताए । ‘‘बजारलाई अझ व्यवस्थित बनाउनका लागि पसलहरु हटाइएको हो ।’’ प्रमुख मेहताले भने–‘‘क्रमशः नगरपालिकाका अन्य क्षेत्रमा रहेका अतिक्रमहरु पनि हटाइने छ ।’’
नगरपालिकको स्वामित्वमा रहेको सार्वजनिक जग्गा बर्षौदेखि अतिक्रमण गरेर निर्मित टहराहरुमा सञ्चालन गरिँदै आएको कपडा लगायत विभिन्न पसलहरु हटाइएको मेहताले जानकारी दिए । रेडक्रश भवनदेखि सार्वजनिक बसपार्कको शौचालय सम्म अतिक्रमण गरेर बनाईएको २० वटा पसल तीन दिन लगाएर खाली गराइएको हो । खाली गराइएको सो स्थानमा अब नगरपालिकाले भवन निमार्ण गरेर भाडामा लगाउने समेत मेहताले बताए ।
हाल हटाईएको पसल व्यवसायहरुलाई नजिकै रहेको जनसागर पोखरिको किनारमा सारिएको छ । सो पोखरिको किनारमा पनि व्यापार व्यवसाय सञ्चालन गर्न छुट्टै अर्को २४ कोठाको सटर निमार्ण गरिने मलंगवा नगरपालिकाले जनाएको छ । यता व्यापारीहरुले भने बिना कारण आफुहरुलाई हटाएको भन्दै नवल रायको संयोजकत्वमा संघर्ष समिति गठन गरेको बताइएको छ ।