कृष्णादेवीको प्रधानाध्यापकमा शर्मा

सर्लाही समाचारदाता
मलंगवा, चैत १६ । सदरमुकाम मलंगवा स्थित श्रीमती कृष्णादेवी उमाविको प्रधानाध्यापकमा रामकुमार शर्माले जिम्मेवारी सम्हालेका छन् ।
आईतबारबाट शर्माले कृष्णादेवीको प्रधानाध्यापकको कार्यभार सम्हालेका हुन् । उमावि बलराका प्रधानाध्यापक रहेका शर्मालाई जिल्ला शिक्षा कार्यालयले कृष्णादेवी उमाविमा प्रअको रुपमा सरुवा गरेको हो । उक्त उमाविमा प्रअको विषयमा विभिन्न शिक्षक संघ संगठनबीच तिब्र होडबाजी रहेपनि नेपाल शिक्षक संघसँग आवद्ध शर्माले बाजी मारेका छन् । क्षेत्रिय शिक्षा निर्देशनालयको सहमति अनुसार चैत १४ गतेको निर्णय अनुसार जिल्ला शिक्षा कार्यालयले शर्मालाई कृष्णादेवी उमाविको प्रअमा सरुवा गरेको शिक्षा कार्यालय स्रोतले जनाएको छ ।
तत्कालिन प्रधानाध्यापक गोविन्दलाल कर्णले अवकाश पाएपछि उक्त उमाविमा प्रअ पद खालि रहेको थियो । अवकाश अघि तत्कालिन प्रअ कर्णले सोही उमाविका शिक्षक जितेन्द्रलाल कर्णलाई निमित्त दिएका थिए । तर सोही उमाविका शिक्षक रामनिवास साहले पुनरावेदन अदालतमा मुद्धा दायर गरेपछि अदालतले वरिष्ठ शिक्षकलाई निमित्तको जिम्मेवारी दिन आदेश दिएको र सोही आदेश अनुसार साह नै निमित्त प्रअ भएका थिए । उक्त उमाविमा प्रअका लागि विभिन्न राजनैतिक दल, शिक्षक संघ संगठन, सदरमुकाबासी र अभिभावकहरुबीच नै व्यापक होडबाजी चलेको थियो । शर्मा उक्त उमाविमा कार्यरत शिक्षकहरु मध्ये सबैभन्दा वरिष्ठ रहेको समेत बताइएको छ ।