चिनी उद्योगको विवादमा सुरक्षाकर्मी घाइते

चिनी उद्योगको विवादमा सुरक्षाकर्मी घाइते
सर्लाही समाचारदाता
धनकौल प., चैत १० । उखु विक्री गर्ने चलानपूर्जीको विषयमा भएको विवादका कारण सोमबार धनकौल प. स्थित चिनी उद्योग परिसरमा भएको झडपमा सुरक्षाकर्मी सहित आधा दर्जनभन्दा बढी घाइते भएका छन् ।
धनकौल प. स्थित अन्नपूर्ण सुगर मिलमा किसान र प्रहरी विच झडप हुँदा आधा दर्जनभन्दा बढी घाइते भएका हुन् । मिलले स्थानीयलाई चलान नदिएको, जिल्ला वाहिरको उखु ल्याएको, ठेकदारलाई चलान बेचेको, नेताको सिफारीसमा चलान वितरण गरेको लगायतको आरोप लगाउँदै उद्योग परिसरमा विरोध प्रदर्शन गरेपछि स्थिती नियन्त्रणमा लिने क्रममा सुरक्षाकर्मी र स्थानीय सर्वसाधारण घाइते भएका थिए । किसानले प्रहरीको दुईवटा जिप ढुंगा हानेर तोडफोड गरेका छन् । मिलले विना चलानका उखु क्रसिङ गर्न नसक्ने भन्दै फिर्ता गर्न खोजेपछि किसानले विरोध प्रदर्शन गरेका थिए ।
भिड तितरवितर पार्न प्रहरीले करिब दुई दर्जन हवाई फायर गरेको छ । जिल्ला प्रहरी कार्यालयका प्रवक्ता प्रहरी निरीक्षक पृथ्वीनारायण ओलीले घटनामा परि इलाका प्रहरी कार्यालय गढैयाका प्रहरी निरीक्षक रुद्र चुँडाल सहित केही सुरक्षाकर्मी घाइते भएको बताए । सशस्त्र प्रहरीको जिप जलाउने प्रयास गरेपछि हवाई फायर र अश्रु ग्यास प्रहार गरेर भिड तितर वितर पारिएको उनले बताए । आक्रोसित सयौं किसान मिल वाहिर दुईघण्टा भन्दा बढीसम्म नारावाजी गरेर बसेका थिए । विरोधमा उत्रिएका किसानको ढुंगा प्रहारबाट सुरक्षाकर्मीहरु घाइते भएका हुन् । उखु खेतमै खडा भएपनि मिलले क्रसिङका लागि चलान नदिएर ठेकेदार मार्फत उखु खरिद गर्न थालेपछि विना चलानपूर्जी करिब ५० ट्रयाक्टर उखु लिएर किसान पुगेका थिए । मध्यान्ह १२ बजेदेखि सुरु भएको तनाव अपरान्ह ३ बजे वार्ता गरि समस्याको समाधान निकाल्ने सहमतपिछि मथ्थर भएको छ । प्रहरी प्रवक्ता ओलीले आगामी बुधबार जिल्ला प्रशासन कार्यालयमा उद्योग, किसान सहितका सरोकारवाला पक्षहरुबीच वार्ता हुने गरि तत्काललाई समस्या समाधान भएको बताए । बुधबार वार्ता हुनेभएपछि घटना नियन्त्रणका क्रममा पक्राउ परेका एकजनालाई पनि प्रहरीले छाडेको छ ।