धनकौल चिनिमिलमा सर्वपक्षीय छानवीन गरिने

सर्लाही समाचारदाता
मलंगवा, चैत १२ । सर्लाहीको धनकौल प. स्थित अन्नपूर्ण सुगर मिलमा दुईदिन अघि भएको झडपबारे बुधबार भएको छलफलले विभिन्न निर्णयहरु गरेको छ । जिल्ला प्रशासन कार्यालयमा भएको छलफलले उद्योग र किसानको पक्षबाट देखिएका कमि कमजोरीलाई तत्काल सच्याएर अगाडी बढ्ने सहमति गरेको हो ।
किसानको तर्फबाट देखिएको कमजोरी एवं उद्योगको तर्फबाट चलान पूर्जी वितरण, आन्तरिक व्यवस्थापन र उखुको भुक्तानीमा देखिएको समस्याबारे तत्काल समाधान गर्ने सहमति भएको प्रमुख जिल्ला अधिकारी दिनेशकुमार घिमिरेले बताए । ‘‘आज दिनभर भएको छलफलले किसानको पक्ष र उद्योगको तर्फबाट भएक कमि कमजोरी सुधार गर्ने सहमति भएको छ ।’’ प्रजिअ घिमिरेले भने–‘‘किसान र उद्योगीकोतर्फबाट संयुक्त छानवीन गरि दोषि देखिएकालाई कार्वाही गर्ने सहमति समेत भएको छ ।’’
प्रजिअ घिमिरेका अनुसार बैठकले गत सोमबार भएको झडपका क्रममा क्षतिग्रस्त बनेको सशस्त्र प्रहरीको जीप तत्काल उद्योग पक्षले मर्मत संभार गर्ने र छानवीन गरि दोषि देखिएकाबाट भराउने सहमति गरेको छ । किसानहरुले उद्योगले अनियमित ढंगले चलानपूर्जी वितरण गरेको, उखुको भुक्तानी अन्धाधुन्ध वितरण गरेको लगायत आरोप बैठकमा लगाएका थिए ।
बैठकमा किसान प्रतिनिधिहरुले एकमाथि अर्को प्रश्न अनि आक्रोश व्यक्त गरेपछि अन्नपूर्ण मिलका प्रबन्ध निर्देशक (मालिक) राकेश कुमार अग्रवाल निकै भावुक बनेका थिए । ‘‘किसान मेरो लागि देवता हो ।’’ जवाफ दिने क्रममा अग्रवालले भावुक हुँदै भने–‘‘कर्मचारी नियुक्त र चलान वितरणमा बाहिरी हस्तक्षेपले हामी चुकेका छौ ।’’
उद्योगपति आभुक भएपछि उद्योगका महाप्रबन्धक ज्ञानप्रसाद भट्टराई किसान प्रतिनिधिबाट आएको प्रश्नहरुको जवाफ दिएका थिए । राजनीतिक दवावकै कारण उद्योग अलपत्र बनेकोले किसानको सहयोग चाहिएको उनले बताए ।
चलान वितरण, उखुको भुक्तानी लगायतमा सिस्टम अनुसार गर्ने र उद्योगको व्यवस्थापन सुधार गर्ने सहमति भएको महाप्रबन्धक भट्टराइले बताए । ‘‘यसवर्ष हामीले पूर्ण रुपमा उखु क्रसिङ गर्छौ भन्ने सोचेका पनि थिएनौं ।’’ भट्टराइले सर्लाही दैनिकसँग बुधबार साँझ भने–‘‘अब हामी स्थानीय किसानको उखु क्रसिङ नसकि उद्योग बन्द गर्दैनौं ।’’
ट्रायलको रुपमा उद्योग सञ्चालन गरिएकाले चलान वितरण, उखुको रकम भुक्तानी आदिमा समस्या देखिएको र आगामी वर्ष तालिका बनाएरै काम गरिने भट्टराइले बताए । ‘‘ट्रायलकै रुपमा उद्योग सञ्चालन गरिएकाले किसानको उखु सर्भे नगरिएकाले चलान वितरणमा समेत समस्या देखिएको छ ।’’ महाप्रबन्धक भट्टराइले भने–‘‘आगामी वर्षबाट सर्भे गरेर सिस्टममा उद्योग सञ्चालन हुनेछ, जसले गर्दा देखिएका यावत समस्याहरु आउँदैनन् ।’’ गत सोमबारको घटना उद्योगका कर्मचारीको काम गर्ने प्रवृत्ति, किसानको ढाँट्ने समस्याले लगायतले गर्दा निम्तिएको समेत महाप्रबन्धक भट्टराइले दावी गरे ।
गत सोमबार धनकौलमा रहेको अन्नपूर्ण चिनी उद्योगमा किसानहरुले विभिन्न माग राख्दै प्रदर्शन गरेपछि स्थितीलाई नियन्त्रणमा लिने क्रममा सुरक्षाकर्मी र किसानहरु बीचमा झडप भएको थियो । झडपका क्रममा इलाका प्रहरी कार्यालय गढैयाका प्रहरी निरीक्षक रुद्र चुँडाल सहित सुरक्षाकर्मीहरु एवं  आधा दर्जनभन्दा बढी किसान घाइते भएका थिए । बैठकले घटनामा संलग्नहरुको खोजी कार्य गरि कारवाही गर्ने समेत निर्णय गरेको छ ।
उद्योग व्यवस्थापकले उखु हुदै नभएकालाई चलना पुर्जी दिएको, राजनीति पहुचबलाले मात्रै चलान पाउने गरेको र होली पर्वको अवसरमा किसानलाई भुक्तानि नगरेको भन्दै गत सोमबार स्थानीय किसानहरु सयौं टायरगाढामा उखु लिएर उद्योगमा पुगेका थिए । उद्योगले तालिका नबनाइ आसेपासेलाई मात्र चलान बिक्रि गर्दा किसान मारमा परेको हथियौलका उखु कृषक अभय सिंहले बताए । हथियौल, बलरा र छटौलमा एक महिना यता कसैले चलनापुर्जी नपाएको उनले बताए । किसानको उन्नती गर्न स्थापना भएको चिनी उद्योग व्यक्तिको लाभमा मात्रै सिमित भएको डुमरीयाका कृषक राजेश सिंहले बताए । उद्योगबाट निस्केको दुर्गन्धित पानीले सिचाइका लागि प्रयोग हुने मनुषमारा सिचाइमा अर्को समस्या उत्पन्न भएको उनले बताए ।
उखु वार्डमा चलान र उखु खरिद विक्रि गर्ने दलालका कारण किसना मार्कामा परेको उखु कृषक पप्पु चौधरीले बताए । एक ट्रयाक्टर उखु उद्योगलाइ दिन दलालबाट २ हजारमा चलानपुर्जी किन्नु परेका उखु कृषक नविन अधिकारीले बताए ।