एसएलसी दिँदा दिँदै चार छात्रा बेहोस

एसएलसी दिँदा दिँदै चार छात्रा बेहोस
सर्लाही समाचारदाता
जब्दी, चैत ११ । एसएलसी परीक्षाका क्रममा मंगलबार दुई छुट्टाछुट्टै केन्द्रमा चारजना छात्राहरु परीक्षा दिदा दिदै एक्कासी बेहोस भएका छन् ।
एभरेष्ट उमावी परीक्षा केन्द्र जब्दीमा मंगलबार अनिवार्य सामाजिक विषयको परीक्षा सुचारु भएको केहि बेरमा तीनजना छात्रा एक्कासी बेहोस भएका हुन् । परीक्षा सुरु भएको करिव १० मिनेट पछि तीन जना छात्राहरु एक्कासी बेहोस भएका सहायक केन्दाध्यक्ष ललिन्द्र चौधरीले जानकारी दिए । बेहोस भएका छात्राहरु मध्ये दुई जनाले केहि बेरपछि होसमा आएर परीक्षा दिएको भएपनि एक छात्रा भने परीक्षाको अवधी भरी बेहोस भएका चौधरीले बताए ।
उनीहरुले परीक्षा दिन आउँदा केहि पनि नखाएका र अन्य दिनको तुलनामा आज गर्मी पनि बढी भएका कारण छात्राहरु बेहोस भएका हुन सक्ने आशंका गरिएको छ । बेहोस हुने तीनै जना छात्रा नेपाल राष्ट्रिय जनता उमावी कालिन्जोर घारिबथानका रहेका चौधरीले बताए । परीक्षामा अन्य केहि परीक्षार्थीहरुले पनि एक्कासी पेट दुख्यो भनेपछि कक्षा भित्रै प्राथमिक उपचार गरेर परीक्षा दिन लगाएको जनाईएको छ ।
त्यस्तै सर्लाहीको बरहथाव स्रोत केन्द्रमा पनि आज एसएलसी परीक्षा दिँदा दिँदै एक छात्रा एक्कासी बेहोस भएकी छन् ।
त्यस्तै परीक्षामा होहल्ला गरिएको भन्दै पब्लिक मावि पर्सा परीक्षा केन्द्रमा आज ३० परक्षार्थीहरुको आधा घण्टा उत्तरीपुस्तिका खोसिएको जिल्ला शिक्षा कार्यालयका कवीराज उपे्रतीले जानकारी दिए । सो परीक्षा केन्द्रमा केन्द्राध्यक्षलाई पनि सचेत गराईएको उप्रतीले बताए । त्यस्तै सर्लाहीको ढुंगे्रखोला परीक्षा केन्द्रमा एक र बबरगंज परीक्षा केन्द्रमा दुई परीक्षार्थीहरुको बीचैमा उत्तरीपुस्तिका खोसिएको जिल्ला शिक्षा कार्यालय सर्लाहीले जनाएको छ । अन्य दिन विभिन्न परीक्षा केन्द्रमा परीक्षार्थीहरु र निरीक्षक निष्काशति हुने गरेका भएपनि आज भने ३१ वटै परीक्षा केन्द्रामा कोही पनि निष्काशनमा नपरेका बताईएको छ ।