दुई निरीक्षक र एक परीक्षार्थी निष्काशित

दुई निरीक्षक र एक परीक्षार्थी निष्काशित
सर्लाही समाचारदाता
मलंगवा, चैत १० । एसएलसी     (प्रवेशिका) परीक्षा–२०७० अन्तर्गत चौथो दिन सोमबार भएको परीक्षामा सर्लाहीमा दुई निरीक्षक र एक परीक्षार्थीलाई निष्काशित गरिएको छ ।
अमर्यादित गतिविधि गरेको भन्दै रामवन उमावी स्रोत केन्द्र र जेसिस बोडिङ स्कुल मलंगवाका निरीक्षक निष्काशित गरिएको जिल्ला शिक्षा कार्यालयले जनायो । परीक्षार्थीलाई चिट चोराउँदै गरेको भेटिएपछि उनीहरुलाई निष्काशित गरिएको हो ।
त्यस्तै हरिवनमा रहेको महादेव जनता उमावी स्रोत केन्द्रमा अमर्यादित गतिविधि गरेको भन्दै एक परीक्षार्थीलाई निष्काशित गरिएको जिल्ला शिक्षा कार्यालय सर्लाहीले जनाएको छ । हालसम्म सर्लाहीमा एसएलसी परीक्षा अन्तर्गत ८६ जना परीक्षार्थी र ८ जना निरीक्षक कार्वाहीमा परेका छन् ।
अमर्यादित एवं अनियमित क्रियाकलाप गर्ने केन्द्राध्यक्ष, निरीक्षक, परीक्षार्थी एवं आम सर्वसाधारणलाई नियमानुसार तुरुन्त कार्वाही गरिने एसएलसी परीक्षा समन्वय समिति सर्लाहीका अध्यक्ष एवं प्रमुख जिल्ला अधिकारी दिनेशकुमार घिमिरेले बताए ।
एसएलसी परीक्षामा चिट चोराउने र प्रश्नपत्र बाहिर पठाउने गरेको भन्दै परीक्षा नियन्त्रण कार्यालय सानोठिमीले सर्लाही सहित तराईका ८ जिल्लालाई संवेदनशील जिल्लाको सुचिमा राखेको छ ।