मह सिवसमा ¥याली र प्रदर्शनी

कार्यक्रम स्थलमा राखिएको मह एवं मह उत्पादन सम्बन्धि सामानहरुको प्रदर्शनी ।

सर्लाही समाचारदाता
नवलपुर, चैत १३ । नेपाल मौरी पालक संघ सर्लाहीको आयोजनामा बुधबार नवलपुरमा विविध कार्यक्रमहरु सम्पन्न भएको छ ।
मह दिवस एवं मौरी प्रदर्शनी नाम दिईएको सो कार्यक्रममा मौरी पालन क्षेत्रका विज्ञ, सरकारी अधिकारी, मौरी पालन व्यवसाय गर्ने किसान लगायतको सहभागिता रहेको थियो । मौरी पालन क्षेत्रमा आवद्ध उल्लेख्य महिलाहरु सहित सर्वसाधारणको सहभागितामा मौरी पालन एवं मह सम्बन्धी विभिन्न नाराबाजीका साथ सुरु भएको ¥यालीले नवलपुर बजार परिक्रमा गरेको थियो । नवलपुर बजार परिक्रमा पश्चात ¥याली सभामा परिणत भएको थियो । जिल्ला कृषि विकास कार्यालयका प्रमुख युगल किशोर तिवारीको सभापतित्वमा भएको कार्यक्रममा नेपाल सरकार मौरी विकास शाखा ललितपुर गोदावरीकी प्रमुख सावित्री बराल प्रमुख अतिथि रहेकी थिइन् । कार्यक्रममा नेपाल मौरी पालक महासंघका महासचिव हेमराज देवकोटाले मौरी पालन व्यवसायका अवसर, चुनौती, कठिनाई, फाइदा लगायत विविध पक्षहरुबारे कार्यपत्र प्रस्तुत गरेका थिए ।
सरकारको नीति र मौरीपालक किसानहरुको लागी अनुदान रकमको व्यवस्था नभएको हुँदा मौरीपालन व्यवसाय खस्कँदै गएको औल्याएको कार्यपत्रमा मौरी व्यवसाय दीगोपनका लागी अनुदानको आवश्यकता भएको हुँदा सरकारले मौरीपालक किसानको लागी दीगोपना नीति कार्यान्वयन गरी अघि बढ्नु पर्ने सुझाव दिइएको छ । मौरीपालन व्यवसायबारे अझै पनि जनमानसमा भ्रम रहेको भएता भने त्यस्तो नभई आम फूल्यजन्य बनस्पतीमा परागसेचन गर्ने ८० प्रतिशत काम मौरीबाटै हुने भएकाले त्यसतर्फ सचेतना बढाइनु जरुरी रहेको कार्यपत्रले औंल्याएको छ । परागसेचन हुँदा उत्पादनमा समेत बृद्धि हुन गई गरीबी न्यूनिकरण, बन संरक्षण हुनुका साथै स्थानीय बेरोजगार युवाहरुलाई रोजगार बनाई आत्मनिर्भर बनाउन सकिने समेत देवकोटाको कार्यपत्रमा उल्लेख छ ।
कार्यक्रममा चितवनको भण्डारा स्थित मौरी विकास शाखा प्रमुख शिव रिजाल, राष्ट्रिय तेल बाली अनुसन्धान केन्द्र नवलपुरका पिताम्बर ठाकुर, उष्ण प्रदेशीय बागवानी केन्द्रका प्रमुख राकेश ओझा, नेपाल मौरीपालक संघका जिल्ला अध्यक्ष डम्वरदेव पाण्डे, नेकपा एमालेका जिल्ला अध्यक्ष मनोज देवकोटा, सागरनाथ वन विकास परियोजनाका अधिकृत अशोककुमार कर्ण लगायतले मन्तव्य राखेका थिए । मौरी पालक संघ सर्लाहीका अध्यक्ष डम्बरदेव पाण्डेद्वारा स्वागत गरिएको कार्यक्रम संघका सचिव विष्णुप्रसाद मैनालीले सञ्चालन गरेका थिए । नेपाल मौरी पालक संघ सर्लाही, जिल्ला कृषि विकास कार्यालय र चक्रेश्वर तरकारी कृषक समूह नेत्रगंजको संयुक्त आयोजनामा भएको कार्यक्रममा मह, मौरी पालनमा आवश्यक पर्ने विभिन्न सामग्रीहरुको प्रदर्शनी समेत गरिएको थियो । २०५५ साल चैत १३ गते नेपाल मौरी पालक महासंघ गठन भएको दिनलाई हरेक वर्ष मह दिवसको रुपमा मनाउने गरिएको महासचिव देवकोटाले बताए ।