अधिकारी एन्फाको केन्द्रीय सदस्यमा चयन

अधिकारी एन्फाको केन्द्रीय सदस्यमा चयन
सर्लाही समाचारदाता
लालबन्दी, कात्तिक ०८ । जिल्ला फूटवल संघ सर्लाहीका अध्यक्ष पुरुषोतम अधिकारी अखिल नेपाल फुटबल संघ (एन्फा) को कार्यसमिति सदस्यमा चयन भएका छन् ।
विहिबार अवेर सम्पन्न एन्फाको १४ औं साधारण सभाबाट अधिकारी पूनः केन्द्रीय सदस्यमा चयन भएका हुन् । एन्फाको यसअघिको कार्यकालमा पनि लालबन्दी निवासी अधिकारी केन्द्रीय सदस्य रहेका थिए । अधिकारी लामो समयदेखि सर्लाही जिल्ला फूटवल संघको अध्यक्षमा क्रियाशिल छन् । नयाँ जिम्मेवारी थपभएसँगै सर्लाहीको फूटबल विकासमा लागि पर्ने अधिकारीले बताए ।
साधारणसभाले गणेश थापाको अध्यक्षतामा १७ सदस्यीय नयाँ नेतृत्व चयन गरेको हो । साधारण सभाले उपाध्यक्षमा कर्माछिरिङ शेर्पा, किशोर राई झापाली, ललितकृष्ण श्रेष्ठ र विजयनारायण मानन्धर चयन गरेको छ । त्यसैगरि अन्य सदस्यहरूमा भने रत्नकुमार श्रेष्ठ, रमेश रायमाझी, पंकज नेम्वांग, बसन्त अर्याल, गणेशबहादुर चन्द, दिनेश व्यन्जनकार, महम्मद सामी उल्लाह पनि पुरानै अनुहारबाट परेका छन् ।
चयन भएका नयाँ सदस्यहरुमा भने प्रकाश पंगेनी, प्रजेशसिंह राठौर र देवेन्द्रमान सिंह बस्नेत रहेका छन् । त्यस्तै गरि महिला सदस्यमा कसैको पनि मनोनयन नपरेपछि कल्पना पिया श्रेष्ठलाई नियुक्त गरिएको छ ।
संघको महासचिव र कोषाध्यक्ष पदमा भने नयाँ कार्यसमितिको पहिलो बैठकले चयन गर्ने बताइएको छ । यसअघि कार्य समिति ३१ सदस्यीय बनाउने भनिएको थियो तर फुटबलको सर्वोच्च संस्था फिफाले १७ सदस्यीय भन्दा बढी नबनाउनका लागी निर्देशन दिएको थियो ।