माओवादीले भौतिक आक्रमण नगर्ने

माओवादीले भौतिक आक्रमण नगर्ने
सर्लाही समाचारदाता
मलंगवा, कात्तिक १२ । नेकपा–माओवादी बैद्य पक्षले निर्वाचनको समयमा जिल्लामा कसैमाथि पनि भौतिक आक्रमण नगर्ने जनाएको छ ।
संविधान सभाको निर्वाचनमा सहमागि भएका उम्मेद्वारलाई निर्वाचनमा भाग नलिन बैचारिक रुपमा आग्रह गरिने तर भौतिक आक्रमण नगर्ने माओवादी जिल्ला ईन्चार्ज विश्वजीत डिसीले बताए । डिसीले भने –‘अन्यत्र जिल्ला के कारणले उम्मेद्वार माथि आक्रमण भयो भन्ने त्यो त्यहिको विषय होला तर सर्लाहीमा भने कसैमाथि पनि आक्रमण हुदैन ।’’ सहमति विनानै हुन लागेको संविधान सभा निर्वाचन नाटक मञ्चन मात्र भएको जनतालाई सम्झाउने र उम्मेद्वारलाई समेत चुनावमा भाग नलिन आग्रह गरिने डिसीको कथन छ ।
निर्वाचनमा भाग नलिन जिल्लाका सम्पूर्ण उम्मेद्वारहरुलाई पत्राचार गरिसकिएको उल्लेख गर्दै डिसीले अगाडि भने –‘अब पुनः साक्षत्कार र भेटघाट गर्ने कार्यक्रमलाई अगाडी बढाउछौं ।’ विगतमा भएको संविधान सभाको निर्वाचनले चार वर्षसम्म पनि संविधान बनाउन नसकेको उल्लेख गर्दै डिसीले ८० प्रतिशत काम सकिएको कुनै दलको घोषणा पत्रमा नसमेटिएकोले यो निर्वाचनले निकास ननिकाल्ने उल्लेख गरे । अघिल्लो संविधान सभामा दलहरु विच ९५ प्रतिशत सहमति भएको तर पाँच प्रतिशत कुरा नमिलेर सम्पूर्ण कार्य नै खराब भएकाले यसपाली अघिको सहमति सम्मपनि नपुग्ने डिसीले दावी गरे । गोलमेच सम्मेलनबाट निस्कीएको सहमतिसँगै संविधान सभाको निर्वाचन भएमा निर्वाचनको सार्थकता हुने नकपा–माओवादीको धारणा रहेको बताइएको छ ।