नागरिक समाजको जिम्मा झालाई

नागरिक समाजको जिम्मा झालाई
सर्लाही समाचारदाता
मलंगवा, कात्तिक ०९ । सदरमुकाम मलंगवामा शनिबार भएको भेलाले नागरिक समाज सर्लाहीको सम्पूर्ण जिम्मेवारी अगूवा उग्रकान्त झालाई दिएको छ ।
कृष्णादेवी उमावि मलंगवा परिसरमा शनिबार विहान भएको भेलाले नागरिक समाज सर्लाहीको तर्फबाट हुने सम्पूर्ण कामहरुको जिम्मेवारी आफूलाई दिएको झाले बताए । झाका अनुसार कार्यक्रममा नागरिक समाज सर्लाहीका संयोजक नन्दलाल राय, उपसंयोजक रामदेव ठाकुर लगायतले वर्तमान परिस्थितीमा राजनैतिक कार्यभार सम्हाल्नु परेकाले तत्कालका लागि नागरिक समाज सर्लाहीको पदभारबाट मुक्त गर्न आग्रह गरेका थिए । राय एमाओवादी को तर्फबाट क्षेत्र नं. ६ मा उम्मेद्वार बनेका छन् भने ठाकुर राजेन्द्र महतो नेतृत्वका सद्भावनाको चुनाव प्रचारप्रसारमा क्रियाशिल छन् । ठाकुर सद्भावना सम्बद्ध बुद्धिजीवी मञ्चका अध्यक्ष हुन् ।
भेलाले आगामी संविधान सभाको निर्वाचन सम्पन्न नभएसम्मका लागि नागरिक समाज सर्लाहीको संपूर्ण जिम्मेवारी झालाई दिने निर्णय गरेको थियो। भेलामा मानवअधिकारकर्मी मुकेश मिश्र, खुटौनाका यूवा दिलीप साह लगायतले स्वतन्त्र ढंगले निर्वाचन अनुगमनमा सहयोग पु¥याउने प्रतिबद्धता समेत जनाएको झाले बताए । निर्वाचनको गतिविधी लगायत आचारसंहिताको उल्लंघन लगायत विषयमा नागरिक समाज सर्लाहीले प्रभावकारी अनुगमन गर्ने समेत झाको प्रतिबद्धता थियो ।