भट्टराईको घोषणा पत्र सार्वजनिक

भट्टराईको घोषणा पत्र सार्वजनिक
सर्लाही समाचारदाता
हरिवन, कात्तिक १३ । संविधान सभाका लागि क्षेत्र नं. २ का स्वतन्त्र उम्मेद्वार नवराज भट्टराईले बुधबार आÇनो घोषणा पत्र सार्वजनिक गरेका छन् ।
विहान गाविसको कार्यालय हरिवन परिसरमा रहेको पूर्व अध्यक्ष नारायण उप्रेतीको शालिकमा माल्यार्पण गर्दै घोषणा पत्र सार्वजनिक गरिएको भट्टराईले बताए । वामपन्थी आन्दोलनमा लामो समय विताएका भट्टराईले जिल्लाको विकास निर्माणमा प्रतिबद्धता सहितको घोषणा पत्र सार्वजनिक गरेका हुन् ।
घोषणा पत्र सार्वजनिक अवसरमा विभिन्न शहिद परिवारका सदस्यहरुलाई समेत सम्मान गरिएको भट्टराईले बताए । कम्युनिष्ट योद्धा नारायण उप्रेतीकी आमा टिकालक्ष्मी उप्रेती, सहिद परिवारहरु केशव गौतम, लक्ष्मी गौतम, गणेशहरि अधिकारी लगायतलाई सम्मान गरिएको भट्टराईले जानकारी दिए । घोषणा पत्र भने पुराना कांग्रेस नेता एवं हाल जन कांग्रेसका कार्यवाहक अध्यक्ष शिवप्रसाद दहालले सार्वजनिक गरेका थिए ।
समग्र सर्लाही सहित विशेष गरी क्षेत्र नं. २ को विकास निर्माण एवं आम सर्वसाधारणको हकहितमा लड्ने प्रतिबद्धता जनाउँदै भट्टराईले आफूलाई अमूल्य मत दिएर विजयी गराउन समेत आग्रह गरे । उनको घोषणा पत्रमा राजनैतिक रणनीति, राज्य संचालन, शिक्षा र रोजगार, नागरिकता, औद्योगिक कार्यक्रम, स्वास्थ्य लगायत विषयमा प्रतिबद्धताहरु उल्लेख छन् । भट्टराई निरंकुश शासन कालमा भुमिगत बामपन्थी आन्दोलनमा सक्रिय थिए ।