स्त्री रोगको स्वास्थ्य शिविर

स्त्री रोगको स्वास्थ्य शिविर
सर्लाही समाचारदाता
नवलपुर, फागुन ११ । स्त्री रोग स्वास्थ्य शिविर सञ्चालन समिति नेत्रगंजको आयोजनामा आइतबार नवलपुर बजारमा स्त्री रोग सम्वन्धी एक दिने निःशुल्क स्वास्थ्य शिविर सम्पन्न भएको छ ।
जिल्ला विकास समितिको कार्यालयको आर्थिक सहयोगमा भएको शिविरमा तीनसय सात जना महिलाहरुले स्वास्थ्य परिक्षण गराएको समितिकी अध्यक्ष मन्दिरा आचार्यले बताइन् । शिविरमा परिक्षण गर्ने क्रममा एक महिलामा पाठेघरको क्यान्सर भेटिएको छ भने आधा दर्जनभन्दा बढी महिलाहरुलाई पाठेघरमा ‘रिङ’ राखिएको शिविर सञ्चालन समितिले जनाएको छ ।
शिविरमा स्त्री रोग विषेशज्ञ डाक्टर ईन्द्रजित महतोको टोलीले बिरामीहरुको स्वास्थ्य परिक्षण गरेको थियो । शिविरमा उपचार गर्न आउने महिलाहरुलाई औषधी समेत निःशुल्क प्रदान गरिएको बताइएको छ ।