कति सुस्त प्रहरी ?

कति सुस्त प्रहरी ?
सर्लाही समाचारदात
मलंगवा, फागुन ०८ । सदरमुकाम मलंगवा स्थित संचारकर्मी शंकर श्रेष्ठको घरमा विहिबार राती चोरीको प्रयास भएको छ । श्रेष्ठ सहित परिवारका सदस्यले चोर आएको तुरुन्तै थाहापाएकाले चोरी भने हुन पाएन ।
राती साँढे १० बजे बाहिर मान्छे बोलेको आवाज सुनेपछि ढोका खोलेर बाहिर निस्कन खोज्दा ढोकामा बाहिरबाट चुक्कुल लगाएको र छेउको कोठामा भाडामा बसेका परिवारलाई फोन गरेर ढोका खोलिदिन भन्दा उनको समेत कोठाको ढोकामा बाहिरबाट चुक्कुल लगाएको संचारकर्मी श्रेष्ठले बताए । लगतै प्रहरीलाई फोन गर्दा झण्डै पौने घण्टापछि मात्र सुरक्षाकर्मीको टोली घरमा आईपुगेको उनले बताए । ‘‘मान्छे कराएको सुनेपछि बाहिर निस्कन खोज्दा ढोकामा बाहिरबाट चुक्कल लगाएको रहेछ ।’’ उनले भने–‘‘छेउको कोठामा भाडामा बस्नेलाई खोल्न भन्दा त त्यहाँ पनि बाहिरबाट चुक्कुल लगाईएको रहेछ ।’’
जिल्ला प्रहरी कार्यालयको कन्ट्रोल अर्थात १०० नम्बरमा घटनाबारे जानकारी गराउँदा २ सय मिटर हाराहारी दुरीमा रहेपनि जानकारी गराएको झण्डै पौने घण्टापछि प्रहरीको टोली आईपुगेको नेपाल पत्रकार महासंघ सर्लाहीका पूर्व अध्यक्ष समेत रहेका श्रेष्ठले बताए । निकैबेरसम्म पनि प्रहरी नआएपछि छिमेकी घरका मानिसलाई फोन गरेर ढोकाको चुक्कुल खोल्न लगाईएको श्रेष्ठले बताए । श्रेष्ठका अनुसार छिमेकीहरु आएर चुक्कुल खोलेपछि सबैतिर हेरेर चोरी नभएको पत्ता लागेको र त्यसको निकैबेरपछि मात्र प्रहरी टोली आएका थिए । ‘‘जिल्ला प्रहरी कार्यालयको नजिकै त यति ढिलागरी प्रहरी आउँछ भने ग्रामीण भेकहरुमा कुनै घटना हुँदा प्रहरीको के आशा गर्नु ?’’ श्रेष्ठको कथन थियो । श्रेष्ठको घर नेपाल बैंक लिमिटेडसँगै टाँसिएर रहेको छ ।