जिर्ण सडकले यात्रुहरु जोखिममा

जिर्ण सडकले यात्रुहरु जोखिममा
सर्लाही समाचारदाता
हरिवन, फागुन ११ । हिउँद लागेयता सर्लाहीको ग्रामीण क्षेत्रका लगायत चुरे भेगमा यातायात सञ्चालन भएपनि जिर्ण सडकका कारण यात्रुहरु जोखिमपूर्ण यात्रा गर्न बाध्य भएका छन् ।
सडक मर्मतका लागि प्रभावकारी काम नहुँदा आफुहरु जोखिमपूर्ण यात्रा गर्न बाध्य भएको यात्रुहरुको गुनासो छ । जिर्ण सडक र पुराना यातायातका साधनमा क्षमताभन्दा बढी यात्रुहरु चढाउँदा ग्रामीण क्षेत्रमा दुर्घटना समेत बढ्दै गएको छ ।
कालिन्जोर, परवानीपुर, नारायणखोला, अत्रौली लगायत गाविसमा पुग्ने अधिकांश ग्रामीण सडकको अवस्था अहिले अत्यन्त नाजुक रहेको छ । भित्री सडक खण्डका धेरै ठाउँमा कल्भर्ट नभएको र भएको कल्भर्ट समेत वर्षौदेखि जिर्ण अवस्थामा हुँदा समेत मर्मत हुन सकेको छैन । सडक मर्मतका लागी वर्षेनी बजेट विनियोजन हुने भएपनि प्रभावकारी काम नहँुदा आफुहरुले निकै जोखिम झेल्नु परेको यात्रुहरुको भनाई छ ।