चोरीको मोटरसाईकल सहित एक पक्राउ

चोरीको मोटरसाईकल सहित एक पक्राउ
सर्लाही समाचारदाता
लालबन्दी, फागुन १२ । इलाका प्रहरी कार्यालय लालबन्दी र ट्राफिक प्रहरी कार्यालयको सुंयुक्त टोलीले चोरीको मोटरसाईकल सहित एकजनालाई पक्राउ गरेको छ ।
सोमबार लालबन्दीमा भएको चेकजाँचका क्रममा परवानीपुर गाविस–१ का शुभलाल स्याङतानलाई चोरीको मोटरसाइकल सहित पक्राउ गरिएको हो । काठमाण्डौबाट गत कात्तिक २५ गते हराएको ना. २२ प ३९२१ नम्बरको मोटरसाईकल चलाईरहेको अवस्थामा स्याङतानलाई पक्राउ गरिएको प्रहरीले जनाएको छ ।
१५० सीसीको पल्सर मोटरसाईकलको नम्बर प्लेट परिवर्तन गरेर चलाएको अवस्थामा प्रहरीले फेला पारेको हो । हाल ना. २५ प ६७९३ नम्बर लेखाएर काठमाण्डौबाट हराएको सो मोटरसाईकल चलाएको अवस्थामा स्याङतानलाई पक्राउ गरिएको इलाका प्रहरी कार्यालय लालबन्दीले जनाएको छ । मापसे चेकजाँच गर्ने क्रममा तीनजना चढेर हिडेको देखेपछि नियन्त्रणमा लिईएको र पछि उक्त मोटरसाईकल चोरीको भएको पत्ता लागेको जिल्ला ट्राफिक प्रहरी कार्यालय नवलपुरले जनाएको छ ।
पक्राउ परेका स्याङतान र मोटरसाईकल आवश्यक कार्वाही प्रकृयाका लागि इलाका प्रहरी कार्यालय हरिपुर पठाइएको लालबन्दी प्रहरीले जनाएको छ ।