गाविस अनुगमनमा जिविसको टोली

गाविस अनुगमनमा जिविसको टोली
सर्लाही समाचारदाता
मलंगवा, फागुन ०८ । जिल्ला विकास समितिको कार्यालयले गाविस कार्यालयका काम कार्वाहीको अनुगमन गर्न ६ वटै क्षेत्रमा अनुगमन टोली खटाएको छ ।
विहिबार स्थानीय विकास अधिकारी उमेश बस्नेतले ६ वटै क्षेत्रमा गाविसका काम कार्वाहीहरुको अनुगमन गर्नका लागि अधिकृतको नेतृत्वमा अनुगमन टोली गठन गरिएको बताए । ‘‘अब गाविस सचिवहरुको गुनासो सुन्ने र भएका काम कार्वाहीहरुको अनुगमन गर्न टोली गठन गरेका छौं ।’’ स्थानीय विकास अधिकारी बस्नेतले भने–‘‘गल्ती गर्ने गाविस सचिवलाई कार्वाही गर्ने लगायत सबैखाले अधिकार अनुगमन टोलीलाई छ ।’’
क्षेत्र नं. १ अन्तर्गतका गाविसहरुमा योजना अधिकृत होमबहादुर थापा, क्षेत्र नं. २ मा सूचना अधिकृत पुष्करमणि घिमिरे, क्षेत्र नं. ३ मा इन्जिनियर मोहरलाल महतो, क्षेत्र नं. ४ मा कार्यक्रम अधिकृत नगिना राय, क्षेत्र नं. ५ मा इन्जिनियर रमेश यादव र क्षेत्र नं. ६ अन्तर्गतका गाविसहरुमा स्थानीय विकास अधिकार बस्नेत आफैले अनुगमन गर्नेछन् । गाविस सचिव विरुद्ध धेरै गुनासा एवं विवादहरु समेत आएकाले कामा कार्वाही एवं गाविस सचिव विरुद्धको गुनासो सुन्नका लागि अनुगमन टोली खटाईएको स्थानीय विकास अधिकारी बस्नेतले बताए ।
जिल्लाकै सम्वेदनशिल मानिएको क्षेत्र नं. ६ अन्तर्गतका गाविसहरुमा भने आफै अनुगमनमा खट्ने स्थानीय विकास अधिकारी बस्नेतको कथन छ । स्थानीय विकास अधिकारी बस्नेतका अनुसार मन्त्रालयले समेत अनुगमन निर्देशिका जारी गरेकाले सोही अनुसार अनुगमन टोली खटाईएको र गाविस सचिव एवं गाविस कार्यालयका काम कार्वाही विरुद्ध आउने सम्पूर्ण गुनासाहरुमा आवश्यक कार्वाही प्रकृया टोलीले नै अगाडी बढाउने छ ।