पासवानलाई जेल र जरिवाना

पासवानलाई जेल र जरिवाना
सर्लाही समाचारदाता
मलंगवा, फागुन ११ । केही दिन अघि पक्राउ परेका नेत्रगंज गाविस–२ का  कामेश्वर पासवान हातहतियार खरखजाना ऐन अनुसार जेल चलान भएका छन् ।
२०६८ सालमा हजरियामा भएको डकैति एवं हातहतियार घटना अनुसार पासवान तीन वर्ष दुई महिनाका लागि जेल चलान भएको जिल्ला प्रहरी कार्यालयका प्रवक्ता प्रहरी निरीक्षक पृथ्वीनारायण ओलीले बताए । जेल भुक्तानका साथै पासवानले ७५ हजार जरिवाना समेत भुक्तान गर्नुपर्ने प्रहरीले जनाएको छ ।
२०७० मंसिर १४ गतेको प्रमुख जिल्ला अधिकारीको फैसला अनुसार पासवानले सो सजाय भुक्तान गर्नुपर्ने भएको हो । डकैति मुद्धामा जिल्ला अदालतले साधारण तारेखमा छाडेपनि सोही घटनामा हातहतियार तथा खरखजाना ऐन अनुसार अगाडी बढाईएको कार्वाहीमा पासवानलाई तीनवर्ष दुई महिना जेल तथा ७५ हजार जरिवाना तिनुपर्ने फैसला सुनाईएको प्रहरीले जनाएको छ ।
उक्त घटनामा संलग्न रहेको आरोपमा पासवान फरार सूचीमा रहेका थिए । उनलाई गत फागुन ८ गते विहिबार इलाका प्रहरी कार्यालय नवलपुरको टोलीले पक्राउ गरेको थियो । सोमबार पासवानलाई जिल्ला कारागार महोत्तरी पठाइने जिल्ला प्रहरी कार्यालय स्रोतले जनाएको छ ।