आज महाशिवरात्रि

आज महाशिवरात्रि
हरिवन, फागुन १४
हिन्दु धर्मावलम्बीहरुले विहिबार शिवरात्रि पर्व मनाइँदै छन् । प्रत्येक वर्ष फागुन चर्तुदर्शीका दिन पर्ने सो पर्वमा हिन्दू धर्मावलम्बीले पशुपतिलगायत देशभरका शिवालयमा भगवान शिवको पूजा तथा आराधना गरी उपासना समेत गर्ने प्रचलन रहेको छ ।
यस अवसरमा जिल्ला स्थित विभिन्न स्थानका शिवालयहरुमा समेत दर्शनार्थीहरुको भिड लाग्ने गर्दछ । हरिपुरको चितायन, मूर्तियाका मुक्तेश्वर, हरिवनको सुखेपोखरी स्थित चतुर्भूजेश्वर, लालबन्दीको डुमडुमे लगायत महादेव मन्दिरहरुमा विहिबार दिनभर पूजाआजाका साथै दर्शनार्थीहरुको भिड रहने स्थानीय बासिन्दाले बताएका छन् ।
वुद्धि र विवेकको अभाव तथा मोह र मायाको अन्धकारमा रही बन्धन वा पाशमा रहेकालाई पशुपतिको आराधना र उपासनाबाट मुक्ति मिल्ने विश्वास छ । विभिन्न १२ ज्योतिर्लिंग मध्ये पशुपतिनाथ पनि महत्वपूर्ण भएकाले हिन्दू धर्मावलम्बीले शिवरात्रिमा विशेष गरि सो मन्दिरमा दर्शन तथा पूजा गर्ने प्रचलन छ । महाशिवरात्रि मान्नका लागि पशुपतिमा भारत लगायत विभिन्न देश सहित मुलुकका विभिन्न स्थानबाट पाँचहजार भन्दा बढी साधुसन्तहरु भित्रिइसकेका छन् ।