हेपाटाइटिस बी बारे संसदमा आवाज

हेपाटाइटिस बी बारे संसदमा आवाज
सर्लाही समाचारदाता
हरिवन, फागुन १२ । सर्लाहीको किशनपुर लगायत विभिन्न गाविसमा फैलिएको हेपाटाइटिस बी को प्रकोप बारेमा तराई मधेश लोकतान्त्रिक पार्टीका जिल्ला अध्यक्ष एवं क्षेत्र नं. ५ बाट निर्वाचित सभासद् जंगीलाल रायले सोमबार आवाज उठाएका छन् ।
सोमबार दिउँसो व्यवस्थापिका संसदको बैठकमा विशेष समय लिएर बोल्दै सभासद् रायले सर्लाहीका विभिन्न गाविसहरुमा हेपाटाइटिस बी ले प्रकोपको रुप लिएपनि सरकारी स्तरबाट कुनै सुनुवाई नभएको भन्दै ध्यानाकृष्ट गराएका थिए । जिल्ला स्थित जन स्वास्थ्य कार्यालय सहित सरकारको उपल्लो निकायले समेत उक्त प्रकोप विरुद्ध कुनै काम नगरेको भन्दै सभासद् रायले रोष प्रकट गरे ।
एचआइभी (एड्स) भन्दापनि खतरनाक मानिने उक्त रोगबाट किशनपुर गाविस–१ मा एकजनाको मृत्यु भईसकेको छ भने आधा दर्जनभन्दा बढी स्थानीय बासिन्दा पीडित भएका छन् । त्यस्तै उक्त रोगको प्रकोप सलेमपुरमा समेत देखिएको सभासद् रायले संसद् बैठकमा दावी गरेका छन् ।
‘‘पशु पंक्षीमा बर्डÇलू रोग देखिए नियन्त्रणका लागि सरकारले तुरुन्तै एक्सन लिन्छ ।’’ सभासद् रायले भने–‘‘तर हाम्रो तिर खतरनाक मानिने हेपाटाइटिस बी को प्रकोप फैलिएको महिनौं हुँदा पनि कुनै कदम चालिएको छैन ।’’ सरकारी वेवास्ताका कारण सयौं सर्वसाधारण उक्त रोगबाट पीडित बन्दै गएको सभासद् रायले बताए ।